Mostert-verhoor: Nog beskuldigdes gevoeg

Augetto Graig – Altesame 29 klagte is uitgelees toe die oudlanddros mnr. Walter (Rooies) Mostert vir die eerste keer Maandag in die Windhoek landdroshof verskyn het. Die 61-jarige voormalige nasionale rugbyspeler word aangekla in verband met die verkryging van onwettige geboortesertifikate, identiteitsdokumente en paspoorte, afpersing en ook in verband met bedrog ter waarde van N$250 000. Sy saak is tot 2 Junie uitgestel, hoofsaaklik om die staat die geleentheid te gee om nog vier beskuldiges by die saak te voeg.Landdros Linus Samunzala moes elk van die 29 klagte in die hof uitlees, omdat die klagstaat nie vooraf aan Mostert se regsverteenwoordiger, mnr. Evert Gous, voorsien is nie. Die klagte handel oor die verkryging van valse geboortesertifikate, identiteitsdokumente en paspoorte vir mnr. Daniel Jacobus Pieterse, me. Else Pieterse, me. Petronella Pieterse en me. Anna Pieterse. Mnr. Pieterse was glo ook betrokke by ’n bedrieglike eiendomsbelegging van N$250 000 en ook die slagoffer in ’n klag van afpersing ter waarde van N$90 000, waarskynlik betaal om te verhoed dat me. Sofia Pieterse in 2014 in hegtenis geneem sou word, vir die oorskryding van die tydperk waarin sy wettiglik in die land was.Namens die staat het mnr. Dominic Lisulo die aansoek om borgtog teëgestaan, volgens hom omdat borg vir Mostert teen die belange van geregtigheid sou wees en omdat hy Mostert as ’n vlugrisiko beskou. Samunzala het borgtog geweier. Mostert was vir sowat drie jaar voortvlugtig, vermoedelik in Suid-Afrika, en het volgens die polisiewoordvoerder adj.komm. Kauna Shikwambi op 30 April weer Namibië ingesluip. Wetsgehoorsame burgers het Mostert by ’n gastehuis op Keetmanshoop gesien en het die Namibiese polisie en het die Teenkorrupsiekommissie (ACC) hiervan ingelig. Die ACC het reeds in 2018 die publiek om hulp gevra om Mostert vas te trek.Volgens Shikwambi het die polisie op 1 Mei ’n padblokkade opgestel en Mostert is naby Tses vasgetrek. Hy was op Seeis in aanhouding tot Maandag se verhoor. Samunzala het ’n aansoek van die staat toegestaan om Mostert na die verhoorafwagtende afdeling van die Windhoek Sentrale Gevangenis te laat verskuif.Ná die verhoor het Mostert gesê: “Met my hand op die Bybel, ek is onskuldig. Hulle het met vuil hande hof toe gekom.” Dit is nie duidelik na wie hy in dié stelling verwys het nie.– augetto@republikein.com.naFOTODie oudlanddros mnr. Walter (Rooies) Mostert het Maandag in die landdroshof in Windhoek verskyn. Foto Augetto Graig

Mostert-verhoor: Nog beskuldigdes gevoeg

Kommentaar

Republikein 2025-09-16

Meld asseblief aan om kommentaar te lewer

Mostert-verhoor: Nog beskuldigdes gevoeg

Kommentaar

Republikein 2025-09-16

Meld asseblief aan om kommentaar te lewer

MELD AAN

Advertensie