Mosie om verkoop van huise te halt

Leandrea Louw op Walvisbaai – Die Popular Democratic Movement (PDM) se raadslid wat op die munisipale raad van Walvisbaai dien, mnr. Richard Hoaeb, het 'n mosie ingedien rakende die beoogde verkoop van huise van die Massiewe Stedelike Gronddiensprojek (MULSP).Hoaeb het gesê as die regte strukture nie in plek is nie, kan hy nie die verkoop van die huise – wat tans leeg staan – ondersteun nie. “Wat was die opdrag rakende die vorige huise wat verkoop is? Watter verkoopsvoorwaardes is gebruik in terme van interne wette? Wat was die oorspronklike ooreenkoms tussen die raad en die ministerie van landelike en stedelike ontwikkeling, indien daar wel een was?”Hy het gesê die ooreenkoms wat tussen die munisipaliteit en die ministerie bereik is, is dat die bou van die MULSP-huise deur die ministerie gefinansier sou word en deur die munisipaliteit bestuur sou word. “Dit is aanvaar tydens 'n buitengewone raadsvergadering op 11 April 2017, waar aanbevelings rakende die bou van die huise gemaak is. Ek het verdere resolusies of verwysingsvoorwaardes aangevra oor hoe hierdie spesifieke huise verkoop is of verkoop gaan word.”Volgens Hoaeb het die relevante bestuur hom ingelig die vorige raad het geen besluit oor dié kwessie geneem nie. “In 'n ander brief van die permanente sekretaris van die ministerie (25 April 2018) wat aan Muronga Haingura gerig is, getiteld 'Versoek om ministeriële goedkeuring om inkomste uit die erwe-wentelfonds te gebruik om boukontrakteurs te betaal', is daar geen duidelike voorskrif of aanduiding van hoe die huise verkoop moes word nie. “Die geld wat aan kontrakteurs betaal is, moet glo verhaal word uit die opbrengs uit die verkoop van huise wanneer dié eiendomme geregistreer word.” Hoaeb het gesê hy is verkies met die mandaat om etiek en goeie bestuur te beoefen, en om beginsels van beide die personeel en die publiek te identifiseer en te bevorder om korrupsie teen te werk.“Dit is ons plig om die verkeerde dinge reg te stel sonder om te veel oor die verlede te tob, en eerder uit die verlede te leer vir 'n beter toekoms. Ons kan dit doen deur middel van korttermynoplossings, sowel as langtermyndoelwitte. Ons moet die regte prosedures volg om korrupsie te voorkom, aangesien hierdie behuisingsprojek tans nog ondersoek word.”Hoaeb het deur die mosie aanbeveel dat die verkoop van die huise tydelik gestaak word totdat die regte strukture in plek is om die proses te vergemaklik. “Die munisipaliteit werk tans onder die beleid vir die verkoop en verhuring van grond, en gevolglik is die verkoop van volledig ontwikkelde strukture onder die huidige beleid onwettig. “Daar is geen beleid vir die verkoop van volledig ontwikkelde strukture nie. Die raad moet met relevante departemente en/of belanghebbendes beraadslaag om 'n 'huisverkope- en huurbeleid' op te stel en te implementeer.”Hoaeb het voorgestel die raad moet 20 van die 102 huise vir personeel oormerk deur die kredietbeheerbeleid en -prosedure (artikel 7 en/of 8) – wat ook volgens die huidige ekonomiese en bestuursraamwerk hersien en gewysig kan word.Hy het gesê die moraal onder die munisipale personeel was laag vandat die nuwe raad aangestel is. “Dit kan aan verskeie redes toegeskryf word, maar die belangrikste is die gebrek aan behuising. Daar is werknemers in laer poste wat al jare by die munisipaliteit werk – sommige wat regmaak om af te tree – en hulle het nie 'n woning van hul eie nie. Hoe kan ons van personeel verwag om die kernwaardes van die munisipaliteit uit te voer as ons as leiers hul hulpkrete ignoreer?”Die mosie is onbestrede ter tafel gelê en na die bestuurskomitee verwys vir verdere beraadslaging, aangesien dit 'n vorige raadsbesluit kan omkeer.Swapo se raadslid, mnr. Ephraim Shozi, het voorgestel die lynministerie word geraadpleeg voordat 'n finale besluit geneem word, aangesien dit 'n regeringsprojek is.Die burgemeester, mnr. Trevino Forbes, het beloof alle relevante stappe sal gevolg word om te verseker die regte besluit word ten bate van die gemeenskap geneem.– republikein@republikein.com.na

Mosie om verkoop van huise te halt

Kommentaar

Republikein 2025-07-21

Meld asseblief aan om kommentaar te lewer

Mosie om verkoop van huise te halt

Kommentaar

Republikein 2025-07-21

Meld asseblief aan om kommentaar te lewer

MELD AAN

Advertensie