Moria se vrugtekoeke is bakgat

In Oktober verlede jaar het die ouers van die Privaatskool Moria weer hande gevat om die jaarlikse vrugtekoekprojek aan te pak, en met me. Renee de Jager aan die stuur van sake, het die projek baie goed verloop.
Iets wat ’n groot verskil in die sukses van die projek gemaak het, is dat ’n nuwe kombuis ingerig is wat Die Bakgat gedoop is. Omdat dit op die skool se koshuisgronde geleë is, kon op meer dae gebak word.
Daar is vir 15 dae gebak en almal het ingespring om te help met selfs leerlinge wat in die middae ’n uur of twee in Die Bakgat deurgebring het.
In 2015 is met die nuwe geriewe en meer dae, altesame 2 507 vrugtekoeke gebak. Dit is ’n rekordgetal vir die projek wat al 20 jaar bestaan. Die vrugtekoeke is landwyd versprei, en ’n paar het dit selfs oor die grens gemaak.
Kettingwinkels het groot hoeveelhede van die gewilde koeke gekoop en vanjaar se projek is reeds in wording. Die gedagte is om dié keer meer vrugtekoeke te bak om die skool se geldkas verder aan te vul. - Alte Kühn