Moria-ouers kook vir die 20ste keer

Ouers van die Privaatskool Moria op Outjo het vanjaar vir die 20ste keer hul houtlepels geswaai om vrugtekoeke te bak – en dit alles om geld vir die skool in te samel.
As die oudste Afrikaanse privaatskool in Namibië, is Privaatskool Moria reeds vanaf 1991 ’n baanbreker in Afrikaanse Christelike kinderopvoeding. Ouers moes baie kreatief dink oor hoe hulle geld gaan kry om alle planne te laat realiseer. Gelukkig het Moria ’n hele paar bobaas baksters as ouers en het hulle met verskillende resepte gespeel. Hulle het toe met die beste vrugtekoekresep vorendag gekom. Gewapen met dié geheime resep en ’n span bereidwillige ouers, onderwysers en kinders, het die Moria-vrugtekoekprojek in 1996 begin.
In 1996 het die span 600 koeke gebak en dit teen N$45 elk verkoop. Twintig jaar later word 2 500 koeke gebak wat teen N$150 elk verkoop word.
In 1996 het die span lang ure by die Matthys Greef-ouetehuis gestaan om die koeke in gewone oonde te bak. Jare later het mnr. Hartmud Basson van die Outjo Bakkery aangebied om sy oonde vir die bakproses beskikbaar te stel.
Nou, na 20 jaar het Privaatskool Moria sy eie bakkery, naamlik Die Bakgat.
Wat het nog in 20 jaar verander?
In 1996 is agt bokse brandewyn aangekoop vir die projek. Vandag staan dié getal op 36 bokse.
In 1996 is ’n rol van 7,6 m se bruinpapier (wat in die panne gebruik is) gekoop. Deesdae gebruik hulle twee rolle van 9,1 m lank elk en dit kos N$801 per rol. In 1996 is 15 kg botter gebruik, terwyl hulle vanjaar 300 kg gebruik het.
Hoe het die gewildheid van Moria se gebak gegroei?
In 1996 is 600 koeke gebak. In 2002 het dit na 900 togeneem. ’n Jaar later is 1 050 vrugtekoeke gebak en in 2005 het Moria se ouers binne vier weke 1 200 koeke gebak. In 2006 het 1 360 koeke in tien dae uit die oonde gekom. In 2010 is nog pannetjies aangekoop en altesame 1 560 koeke is in 10 dae gebak. Verlede jaar is oor 13 dae gebak om bestellings wat die 2 000-kerf bereik het, te kon bereik. Hierdie jaar is weer ekstra pannetjies gekoop en is vir 14 dae gebak, omdat bestellings die 2 500-kerf oorskry het.
Hoe het bestanddele vir 2015 gelyk?
Rosyntjies: 1,2 ton (vergelyk dit met ’n 100 gram sakkie rosyntjies)
Glanskersies: 150 kg
Botter: 300 kg (600 x 500 g! Hoe lank sal ’n huishouding van vier daarmee oorleef?)
Suiker: 500 kg (gestel jy gebruik meer as vyf koppies suiker per dag vir ’n jaar lank)
Eiers: 480 dosyn (2 880 omelette kan gebak word)
Koekmeel: 700 kg (volgens Kook en geniet sal jy 58 330 middelslag pannekoeke hiermee kan bak)
Dadels: 500 kg (2 000 x 250 g dadelblokkies)
Brandewyn: 320 liter (hik . . . 6 400 dubbel brandewyn en Coke’s)
Neute: 300 kg (3 000 sakkies van jou gunsteling supermark se neute)
Die toppunt van die vrugtekoek-projek is die gratis advertensie wat die skool kry. Elke keer wanneer iemand verby ’n Moria-vrugtekoek in ’n winkel stap, sien hy/sy die skool se spanpoging raak.
Is elke vrugtekoek ’n presiese replika? Nee, beslis nie. Die is ’n skool, nie ’n fabriek nie!
Met trots doen die skool ’n beroep op alle oud-Moria-ouers en onderwysers wat al by die vrugtekoek projek betrokke was, om vir hulle ’n houtlepel te stuur met haar/sy naam op, sodat die skool die helpers kan bedank deur die houtlepels teen “Die Bakgat” se mure te plak.