Moody's verwag nóg 'n groter skuldlas
Nominale BBP-groei wat oorskat is en inkomsteprojeksies wat ooroptimisties was, is van die redes vir die regering se bultende skuldlas.
Jo-Maré Duddy - Die internasionale kredietgradeerder Moody's Investors Services deel nie Namibië se optimisme dat die regering se skuldlas teen 2018-'19 tot sowat 40% van die land se BBP sal krimp nie.
Moody's verwag dit sal in dié begrotingsjaar 45,4% van Namibië se bruto binnelandse produk beloop, tien persentasiepunte hoër as die regering se drumpel van 35%. Luidens die minister van finansies, Calle Schlettwein, se jongste bestedingsraamwerk vir die medium termyn (MTEF) wil hy die skuldlas in 2018-'19 tot 40,1% van die BBP verminder – af van die beraamde 41,9% in die huidige begrotingsjaar en 42,1% in die vorige een.
In sy jongste jaarlikse kredietontleding beskryf Moody's die skuldlas as 'n uitdaging vir Namibië se kredietgradering van Baa3 – waarvan die vooruitsig verlede jaar van stabiel na negatief verlaag is. Die regering se skuld in vergelyking met sy inkomste sal net onder die mediaan van ander Baa-lande bly, verwag die gradeerder. Dit weerspieël die regering se “relatiewe sterk vermoë om belasting in te vorder”, aldus Moody's.
Volgens die gradeerder is sowat die helfte van die regering se skuld in buitelandse geldeenhede, vernaamlik Amerikaanse dollar, en het die land se wisselkoersrisiko toegeneem.
Luidens die MTEF sal die regering se totale skuld vanjaar na verwagting bykans N$71,7 miljard beloop, waarvan sowat N$28,4 miljard buitelandse skuld gaan wees. In 2018-'19 sal dit na raming tot sowat N$29,7 miljard styg en ongeveer 40% van totale skuld uitmaak.
“Namibië se kredietuitdagings sluit die skielike stygings in openbare skuldvlakke in, wat in 2016-'17 42,3% van BBP bereik het teenoor 26,2% in 2011,” sê Zuzana Brixiova, 'n visepresident en senior ontleder van Moody's, asook 'n medeskrywer van die jongste verslag.
'Geglip'
Volgens Moody's het die begroting in 2016-'17 “beduidend geglip” – gedeeltelik vanweë die nominale BBP-groei wat oorskat is en inkomsteprojeksies wat ooroptimisties was.
“Die regering se begrotingsglip het tot hoër leenbehoeftes gelei, wat op sy beurt tot 'n vinniger ophoping van staatskuld aanleiding gegee het. Om Namibië se aansienlike begrotingstekorte teen die agtergrond van swakker-as-verwagte begrotingskonsolidering te finansier, het boonop beduidende, dog tydelike, druk op plaaslike likiditeitstoestande geplaas,” sê Moody's.
Sy jongste verslag is bloot om die mark op hoogte te hou en is nie 'n kredietgraderingsaksie nie, beklemtoon Moody's. Namibië se Baa3-gradering – die laagste op beleggersvlak – weerspieël die land se “sterk” groeivooruitsigte op medium termyn, sê Moody's.
Herstel
Die kredietgradeerder verwag 'n herstel in Namibië se diamante-, goud- en uraniummyne, asook 'n ommekeer in landbou wat ekonomiese groei in die komende jare sal aandryf.
Vir vanjaar verwag Moody's ekonomiese groei van 4,5%, gevolg deur 4,9% in 2018.
Regeringsinstellings wat “redelik” sterk is, weerspieël Namibië se rekord van voorspelbare beleid en ondersteun die land se kredietwaardigheid. Politieke stabiliteit en 'n geskiedenis om konsensus te bou, sal 'n ondersteunende makro-ekonomiese beleid en strukturele hervorming bevorder, sê Moody's.
Sou toewyding aan begrotingskonsolidering tot 'n merkbare verlangsaming en uiteindelik 'n ommekeer in skuldophoping lei, kan Namibië sy stabiele vooruitsig by Moody's herwin, aldus die kredietgradeerder. 'n “Beduidende” verbetering in die begrotings- én handelsbalanstekorte en die likiditeitstoestand in die plaaslike mark sal ook help. Voorts sal 'n “wesenlike” verhoging in buitelandse reserwes – “gerieflik bó drie maande se invoere” – ook 'n hupstoot gee, sê Moody's.
'Veilig'
Die jongste Moody's-verslag is “merkbaar” stil oor Suid-Afrika se afgradering na rommelstatus, sê PSG Namibia.
Ondanks die noue bande tussen Namibië en Suid-Afrika wat handel en finansiële markte betref, meen PSG dus agentskappe beskou nie die kredietgraderings van dié twee lande as gekoppel nie. Die kredietgradeerders – Moody's en Fitch Ratings in Namibië se geval – is oënskynlik meer bekommerd oor die moontlikheid van 'n verdere begrotingsglip en die nadelige uitwerking wat dit op die land se skuldfinansieringskoste sal hê, sê PSG. Gegewe die omvang van die vereiste begrotingsbesnoeiings en die steeds wankelrige wêreldekonomie, meen PSG die risiko vir 'n beduidende begrotingsglip op medium termyn is “matig”.
“Totdat daar egter bewyse van só 'n beduidende fiskale glip is, lyk dit asof Namibië se beleggingsgradering veilig is,” sê PSG. Die land se gradering sal net indirek deur afgraderings in Suid-Afrika geraak word, deurdat dit groei kan verlaag of opbrengste op regeringseffekte kan verhoog, sê dié ontleders.
Moody's verwag dit sal in dié begrotingsjaar 45,4% van Namibië se bruto binnelandse produk beloop, tien persentasiepunte hoër as die regering se drumpel van 35%. Luidens die minister van finansies, Calle Schlettwein, se jongste bestedingsraamwerk vir die medium termyn (MTEF) wil hy die skuldlas in 2018-'19 tot 40,1% van die BBP verminder – af van die beraamde 41,9% in die huidige begrotingsjaar en 42,1% in die vorige een.
In sy jongste jaarlikse kredietontleding beskryf Moody's die skuldlas as 'n uitdaging vir Namibië se kredietgradering van Baa3 – waarvan die vooruitsig verlede jaar van stabiel na negatief verlaag is. Die regering se skuld in vergelyking met sy inkomste sal net onder die mediaan van ander Baa-lande bly, verwag die gradeerder. Dit weerspieël die regering se “relatiewe sterk vermoë om belasting in te vorder”, aldus Moody's.
Volgens die gradeerder is sowat die helfte van die regering se skuld in buitelandse geldeenhede, vernaamlik Amerikaanse dollar, en het die land se wisselkoersrisiko toegeneem.
Luidens die MTEF sal die regering se totale skuld vanjaar na verwagting bykans N$71,7 miljard beloop, waarvan sowat N$28,4 miljard buitelandse skuld gaan wees. In 2018-'19 sal dit na raming tot sowat N$29,7 miljard styg en ongeveer 40% van totale skuld uitmaak.
“Namibië se kredietuitdagings sluit die skielike stygings in openbare skuldvlakke in, wat in 2016-'17 42,3% van BBP bereik het teenoor 26,2% in 2011,” sê Zuzana Brixiova, 'n visepresident en senior ontleder van Moody's, asook 'n medeskrywer van die jongste verslag.
'Geglip'
Volgens Moody's het die begroting in 2016-'17 “beduidend geglip” – gedeeltelik vanweë die nominale BBP-groei wat oorskat is en inkomsteprojeksies wat ooroptimisties was.
“Die regering se begrotingsglip het tot hoër leenbehoeftes gelei, wat op sy beurt tot 'n vinniger ophoping van staatskuld aanleiding gegee het. Om Namibië se aansienlike begrotingstekorte teen die agtergrond van swakker-as-verwagte begrotingskonsolidering te finansier, het boonop beduidende, dog tydelike, druk op plaaslike likiditeitstoestande geplaas,” sê Moody's.
Sy jongste verslag is bloot om die mark op hoogte te hou en is nie 'n kredietgraderingsaksie nie, beklemtoon Moody's. Namibië se Baa3-gradering – die laagste op beleggersvlak – weerspieël die land se “sterk” groeivooruitsigte op medium termyn, sê Moody's.
Herstel
Die kredietgradeerder verwag 'n herstel in Namibië se diamante-, goud- en uraniummyne, asook 'n ommekeer in landbou wat ekonomiese groei in die komende jare sal aandryf.
Vir vanjaar verwag Moody's ekonomiese groei van 4,5%, gevolg deur 4,9% in 2018.
Regeringsinstellings wat “redelik” sterk is, weerspieël Namibië se rekord van voorspelbare beleid en ondersteun die land se kredietwaardigheid. Politieke stabiliteit en 'n geskiedenis om konsensus te bou, sal 'n ondersteunende makro-ekonomiese beleid en strukturele hervorming bevorder, sê Moody's.
Sou toewyding aan begrotingskonsolidering tot 'n merkbare verlangsaming en uiteindelik 'n ommekeer in skuldophoping lei, kan Namibië sy stabiele vooruitsig by Moody's herwin, aldus die kredietgradeerder. 'n “Beduidende” verbetering in die begrotings- én handelsbalanstekorte en die likiditeitstoestand in die plaaslike mark sal ook help. Voorts sal 'n “wesenlike” verhoging in buitelandse reserwes – “gerieflik bó drie maande se invoere” – ook 'n hupstoot gee, sê Moody's.
'Veilig'
Die jongste Moody's-verslag is “merkbaar” stil oor Suid-Afrika se afgradering na rommelstatus, sê PSG Namibia.
Ondanks die noue bande tussen Namibië en Suid-Afrika wat handel en finansiële markte betref, meen PSG dus agentskappe beskou nie die kredietgraderings van dié twee lande as gekoppel nie. Die kredietgradeerders – Moody's en Fitch Ratings in Namibië se geval – is oënskynlik meer bekommerd oor die moontlikheid van 'n verdere begrotingsglip en die nadelige uitwerking wat dit op die land se skuldfinansieringskoste sal hê, sê PSG. Gegewe die omvang van die vereiste begrotingsbesnoeiings en die steeds wankelrige wêreldekonomie, meen PSG die risiko vir 'n beduidende begrotingsglip op medium termyn is “matig”.
“Totdat daar egter bewyse van só 'n beduidende fiskale glip is, lyk dit asof Namibië se beleggingsgradering veilig is,” sê PSG. Die land se gradering sal net indirek deur afgraderings in Suid-Afrika geraak word, deurdat dit groei kan verlaag of opbrengste op regeringseffekte kan verhoog, sê dié ontleders.
Kommentaar
Republikein
Geen kommentaar is op hierdie artikel gelaat nie