‘Monument’ op Rehoboth afgetakel

Tanja Bause – “Dit is ons eie mense wat die plek so afbreek, verniel en wegdra. Dit breek my hart.”

So sê 'n ontstelde mnr. Johan Wohler van Rehoboth oor lede van die gemeenskap wat die ou Rekor-sakesentrum op die dorp vernietig.

“Die gebou is in die sewentigerjare gebou. Dit was in sy tyd die sakekern van die dorp gewees, met onder meer ’n bank, restaurant, haarkapper, winkel, apteek en kantore vir verskeie versekeringsmaatskappye wat in die gebou gehuisves was.”

Ná onafhanklikwording is die gebou verkoop en behoort tans aan ’n man wat in Windhoek bly.

Volgens Wohler, wat langs die gebou woon, was daar deur die jare verskeie besighede soos ’n slaghuis, winkels, restaurant en ’n supermark daarin.

Die Namibiese polisie het die gebou vir drie jaar as hul hoofkwartier gehuur, maar in Oktober verlede jaar uitgetrek. Sedertdien staan dit leeg en word stelselmatig afgebreek.

“Jy hoor die gehamer en geklop in die oggend en gedurende die nag soos die mure oopgekap en die elektriese drade gesteel word. Alle glaspanele binne in die gebou is stukkend geslaan. Die plafonne is uitgeruk. Die ligte is uit die dak geruk en op die vloer stukkend gegooi. Die erf is opgegrawe en die drade gesteel. Die diefwerings is van die vensters af gesteel. Alle deure en veiligheidsdeure is weggedra. Alles wat gesteel kan word, is gesteel en dit wat nie gesteel kan word nie, word gebreek en vernietig,” het hy gesê.

“Dit is ’n skande dat ons in ’n moderne gemeenskap leef en mense so ons eie goed kan afbreek, vernietig en wegdra. Dit was nie net die sakesentrum van Rehoboth gewees nie, maar ook die eerste een, en iets om op trots te wees. Ek het nog nie so iets beleef nie, dat mense hul eie geskiedenis so kan verniel. Dit is hartverskeurend om te sien wat met een van Rehoboth se monumente gebeur.”

Volgens Wohler vra hy gedurig die kwaaddoeners om op te hou, maar is die antwoord altyd dieselfde: “Ag, oom Wohler, los ons net uit.”

“Dit is vir my verstommend dat dieselfde gemeenskap wat onlangs die begraafplaas herstel en hernu het, dieselfde gemeenskap is wat ’n historiese gebou plunder en afbreek.”

Volgens Wohler voel die mense wat langs die gebou woon, onveilig en het hy al talle kere die polisie gebel.

“Hulle het al uitgekom om die kwaaddoeners weg te hou, maar dit is van korte duur. Sodra die polisie weg is, kom die kwaaddoeners terug. Ek is raadop en weet nie meer wat om te doen nie.”

Volgens hom het hy ook al talle oproepe na die eienaar van die gebou, asook die polisie in Windhoek gemaak, maar sonder sukses.

Die eienaar van die gebou, mnr. Tyron Plaatjies, het gesê dat dit vir hom ’n teer saak is.

“Ek het die gebou aan die polisie verhuur. Ek het voordat hulle ingetrek het verbeteringe aan die gebou aangebring. Ek het onder meer lugreëling en afskortings ingesit. Ons het ’n inspeksie gehou voordat hulle in die gebou ingetrek het.”

Hy het gesê die polisie het laas jaar vir hom ’n brief gestuur om te sê dat hulle die gebou ontruim.

“Die polisie het nooit my sleutels kom afgee nie en ons het nooit ’n inspeksie gedoen nadat hulle uitgetrek het nie. Hulle is verantwoordelik vir die gebou totdat daar ’n inspeksie gedoen is.

“Die polisie reageer glad nie. Ek het al briewe geskryf en oproepe gemaak. Hulle het immers die gebou in ’n goeie toestand gekry,” het Plaatjies gesê.

Kommissaris George Mahone van die Namibiese polisie het gesê hy is nie van die kwessie bewus nie.

“Onder normale omstandighede is daar ’n kontrak tussen die polisie en die verhuurder. As die verhuurder voel dat die kontrak verbreek is, moet hy dit op skrif sit en na die inspekteur-generaal stuur sodat ons die saak kan hanteer. Ek is glad nie bewus daarvan dat die polisie ’n gebou op Rehoboth gehuur het nie.”