'Moenie NSFAF-geld terugbetaal'
'n Studenteliggaam beroep hom op sy lede om nie studieleningskuld te vereffen nie.
Denver Kisting
'n Studente-organisasie het gister te velde getrek teen die voorstel dat beurse van die Finansiële Hulpfonds vir Namibiese Studente (NSFAF) in lenings omskep word.
Daarnaas het die Namibië Nasionale Studente-organisasie (Nanso) by monde van sy streeksekretaris, mnr. Shoki Kandjimi, sy lede gevra om nie hul NSFAF-skuld te betaal nie.
Kandjimi sê Nanso het reeds tydens 2015 besluit alle lenings moet in beurse omskep word.
Derhalwe, sê hy, is hulle baie bekommerd oor onlangse nuus dat die teenoorgestelde voorgestel word. “Hiermee trek ons te velde teen en verwerp daardie voorgestelde beleid en voel sulke idees is anti-arm, anti-studente en teen 'n beroep op gratis tersiêre onderrig.”
Die studenteleier sê die NSFAF moenie van sy mandaat afwyk om studente finansieel by te staan nie.
Wat die terugbetaling van skuld aan die hulpfonds betref, sê Kandjimi: “Nanso en die studenterade van hoëronderwysinstellings in die Khomasstreek hou vol dat studente nie die geld sal terugbetaal nie. Ons wil dit onomwonde stel dat ons nie geld van lenings sal terugbetaal nie. Dit is ons ouers se geld en ons sal nooit gedruk word om enigiets terug te betaal nie.”
Kandjimi sê Nanso distansieer hom van vorige uitlatings deur 'n ander Nanso-lid wat 'n beroep op studente gedoen het om wél lenings terug te betaal.
Die werksaamhede van die NSFAF word dikwels deur omstredenheid gekenmerk en is onlangs opnuut onder die soeklig geplaas toe die uitvoerende hoof, me. Hilya Nghiwete, geskors is.
Nghiwete beveg tans haar skorsing.
Onlangs is ook berig die NSFAF probeer opnuut om die opstel van 'n nuwe beleid oor finansiële hulp aan studente en skuldinvordering te voltooi.
Die fonds wil die nuwe beleid reeds tydens die huidige boekjaar in werking stel.
Die fonds is tans in troebel water nadat vroeër bevestig is geen nuwe studente sal vir die huidige akademiese jaar hulp van die NSFAF ontvang nie.
Die ministerie van hoër onderwys, opleiding en vernuwing se permanente sekretaris, dr. Alfred van Kent, het onlangs benadruk die fonds sal voortaan binne die perke van sy begroting moet bly, maar die NSFAF sal terselfdertyd rekening moet hou met 'n verwagte toename in die aantal geldige aansoeke om finansiële hulp.
Daar is toe onthul toelae kan afgeskaf en voortaan net lenings toegestaan word. Die fonds kan ook aan die nasionale belastingstelsel gekoppel word om rekordhouding en invordering te vergemaklik.
Volgens die minister, dr. Itah Kandjii-Murangi, is hoër onderwys die afgelope 28 jaar deur middel van geïntegreerde en sinvolle inhoud en ontwikkeling drasties omskep. “Maar ná 28 jaar van onafhanklikheid en net 12 jaar voor 2030 is daar steeds ernstige leemtes in terme van vaardighede en kennis,” het sy gesê.
Die regering het voortdurend die grootste deel van die nasionale begroting aan die onderwyssektor toegeken en miljarde dollar is al aan die NSFAF toegeken.
Volgens die minister is dít wat aan onderwys bestee word, nie die enigste maatstaf vir sukses op die gebied van hoër onderwys nie. Boonop is daar nie genoeg hulpbronne beskikbaar om elke Namibiese student wat dit verdien, finansieel by te staan nie.
“Die druk op die NSFAF se begroting is voortdurend, maar die begroting self bly beperk,” het sy gesê.
Die hersiening van die fonds se beleid spruit uit die feit dat “die NSFAF nie elke Namibiese kind wat daarvoor kwalifiseer, kan ondersteun nie”, het die minister gesê.
Mnr. Jerome Mutumba, die voorsitter van die NSFAF-raad, het gister gesê die raad sal nie in dié stadium op Nanso se eise en uitsprake reageer nie.
'n Studente-organisasie het gister te velde getrek teen die voorstel dat beurse van die Finansiële Hulpfonds vir Namibiese Studente (NSFAF) in lenings omskep word.
Daarnaas het die Namibië Nasionale Studente-organisasie (Nanso) by monde van sy streeksekretaris, mnr. Shoki Kandjimi, sy lede gevra om nie hul NSFAF-skuld te betaal nie.
Kandjimi sê Nanso het reeds tydens 2015 besluit alle lenings moet in beurse omskep word.
Derhalwe, sê hy, is hulle baie bekommerd oor onlangse nuus dat die teenoorgestelde voorgestel word. “Hiermee trek ons te velde teen en verwerp daardie voorgestelde beleid en voel sulke idees is anti-arm, anti-studente en teen 'n beroep op gratis tersiêre onderrig.”
Die studenteleier sê die NSFAF moenie van sy mandaat afwyk om studente finansieel by te staan nie.
Wat die terugbetaling van skuld aan die hulpfonds betref, sê Kandjimi: “Nanso en die studenterade van hoëronderwysinstellings in die Khomasstreek hou vol dat studente nie die geld sal terugbetaal nie. Ons wil dit onomwonde stel dat ons nie geld van lenings sal terugbetaal nie. Dit is ons ouers se geld en ons sal nooit gedruk word om enigiets terug te betaal nie.”
Kandjimi sê Nanso distansieer hom van vorige uitlatings deur 'n ander Nanso-lid wat 'n beroep op studente gedoen het om wél lenings terug te betaal.
Die werksaamhede van die NSFAF word dikwels deur omstredenheid gekenmerk en is onlangs opnuut onder die soeklig geplaas toe die uitvoerende hoof, me. Hilya Nghiwete, geskors is.
Nghiwete beveg tans haar skorsing.
Onlangs is ook berig die NSFAF probeer opnuut om die opstel van 'n nuwe beleid oor finansiële hulp aan studente en skuldinvordering te voltooi.
Die fonds wil die nuwe beleid reeds tydens die huidige boekjaar in werking stel.
Die fonds is tans in troebel water nadat vroeër bevestig is geen nuwe studente sal vir die huidige akademiese jaar hulp van die NSFAF ontvang nie.
Die ministerie van hoër onderwys, opleiding en vernuwing se permanente sekretaris, dr. Alfred van Kent, het onlangs benadruk die fonds sal voortaan binne die perke van sy begroting moet bly, maar die NSFAF sal terselfdertyd rekening moet hou met 'n verwagte toename in die aantal geldige aansoeke om finansiële hulp.
Daar is toe onthul toelae kan afgeskaf en voortaan net lenings toegestaan word. Die fonds kan ook aan die nasionale belastingstelsel gekoppel word om rekordhouding en invordering te vergemaklik.
Volgens die minister, dr. Itah Kandjii-Murangi, is hoër onderwys die afgelope 28 jaar deur middel van geïntegreerde en sinvolle inhoud en ontwikkeling drasties omskep. “Maar ná 28 jaar van onafhanklikheid en net 12 jaar voor 2030 is daar steeds ernstige leemtes in terme van vaardighede en kennis,” het sy gesê.
Die regering het voortdurend die grootste deel van die nasionale begroting aan die onderwyssektor toegeken en miljarde dollar is al aan die NSFAF toegeken.
Volgens die minister is dít wat aan onderwys bestee word, nie die enigste maatstaf vir sukses op die gebied van hoër onderwys nie. Boonop is daar nie genoeg hulpbronne beskikbaar om elke Namibiese student wat dit verdien, finansieel by te staan nie.
“Die druk op die NSFAF se begroting is voortdurend, maar die begroting self bly beperk,” het sy gesê.
Die hersiening van die fonds se beleid spruit uit die feit dat “die NSFAF nie elke Namibiese kind wat daarvoor kwalifiseer, kan ondersteun nie”, het die minister gesê.
Mnr. Jerome Mutumba, die voorsitter van die NSFAF-raad, het gister gesê die raad sal nie in dié stadium op Nanso se eise en uitsprake reageer nie.
Kommentaar
Republikein
Geen kommentaar is op hierdie artikel gelaat nie