Moenie dié pyp rook nie

Estelle de Bruyn - Waterpype, ook bekend as hubbly bubbly-pype, moet ingevolge die wet op die beheer van tabakprodukte (Wet 1 van 2010) geklassifiseer word sodat dit strenger beheer kan word. Só sê me. Lucia Witbooi, adjunkminister van geslagsgelykheid en kinderwelsyn, wat Dinsdag in die Nasionale Vergadering (NV) 'n ernstige pleidooi gelewer het vir beter beheer oor dié soort pyp omdat al meer jongmense dit gebruik en omdat dit vir hulle hoogs toeganklik is. Sy sê die waterpyp is van die buiteland af in Namibië ingebring en dit vernietig kinders se lewens. "In teenstelling met die algemene persepsie bevat die rook van waterpype verskeie giftige bestanddele wat longkanker, hartsiektes en asemhalingsprobleme veroorsaak en skadelik tydens swangerskap is - net soos enige ander tabakproduk. “Die verslawende dwelm nikotien, wat in tabakprodukte voorkom, is ook in waterpype," het Witbooi gesê. Sy sê die verskil tussen die rook van sigarette en die rook van waterpype is groot. Sessies waartydens die waterpyp gerook word, stel rokers aan meer rook oor 'n langer tydperk bloot as die rook van sigarette. Sigaretrokers neem agt tot 12 trekke oor 'n tydperk van vyf tot sewe minute en asem 0,5 tot 0,6 liter rook in.Hierteenoor sal 'n waterpyproker in 'n tydperk van 20 tot 80 minute 50 tot 200 trekke neem, wat wat neerkom op tussen 0,15 en een liter elk. Waterpyprokers asem dus baie meer rook as sigaretrokers in. Om waterpype te deel is ook onhigiënies en kan verskeie ongewenste gevolge hê. Witbooi sê Namibiese ouers rook die pype saam met hul kinders as familie-ontspanning en ouers koop die pype omdat hulle dink dit is onskadelik en hulle is dikwels onbewus van die gevare en gesondheidsrisiko's wat dit vir hul kinders inhou. Sommige kinders so jonk as 13 jaar begin al waterpype rook en beweeg dan aan na dagga.Groepsdruk dra hiertoe by, sê sy. Witbooi het lede van die NV genooi om self te gaan ondersoek instel na die wydverspreide gebruik van waterpype. "Ek is bekommerd daaroor dat ons kinders sonder enige waardes en morele standaarde grootword. Dit is kommerwekkend dat ons kinders meer besorg is oor die rook van hubbly bubbly-pype as oor hul waardes en hul toekoms. “Ek vrees vir 'n nasie wie se kinders op die verkeerde pad is," het Witbooi gesê.Sy stel voor die wet op die beheer van tabakprodukte word streng toegepas en dat waarskuwings op waterpype aangebring word, soos die wet stipuleer. Artikel 18(1) van dié wet moet ook toepas word, waarin voorgeskryf word dat niemand tabakprodukte aan iemand jonger as 18 jaar mag verkoop of verskaf nie.

Moenie dié pyp rook nie

Kommentaar

Republikein 2025-11-04

Meld asseblief aan om kommentaar te lewer

Moenie dié pyp rook nie

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.