Moeders moet nie hul pligte ontduik

DIE DUIWEL SKRYF: Almal wat bokse vir ongewenste babas ondersteun: Ek laaik julle!

Ek haat liefde. Daardie soort liefde wat sê "love is tough" en "you must be cruel to be kind". Daardie liefde wat ferm is, wat grense stel, wat verantwoordelikheid neem vir eie keuses en dade. Ja, ek háát daardie soort liefde wat sê: "Nee!" Wat sê: "Dis verkeerd! Bly weg!"

Sien, ek is in die slag-, steel- en verwoes-besigheid. Om te lieg en te bedrieg is my spesialiteit.

Ek glo in daai soort "liefde" wat sê "as dit vir jou lekker is, dóén dit. Dis jou reg! Moenie worry oor die gevolge nie."

Enkele van my kliënte het nog teruggedeins voor die gevolge van hul drifte en drange. En sowaar, hier is die oplossing vir hul probleem. Veral skooldogters bars uit hul nate van blydskap. Húlle kan nou die lewe geniet en júlle dra die verantwoordelikheid.

Ek sê weer: Ek laaik julle soort liefde. En om te dink die projek se naam klink so mooi op die oor, só asof die Gees van die Allerhoogste dit geïnspireer het, asof die hemel hieroor juig.

Baie dankie vir julle ondersteuning in mý bedryf. Dit gaan my omset vertiendubbel op júlle koste.

Voor ek vergeet, wees to so gaaf om in elke dorp so 'n boks neer te sit. Ek sal sorg dat hulle vól bly.

Ek is nie 'n ou vir dankie-sê en waardering nie, maar hiervoor is ek dankbaar.

Amper sê ek liefdegroete.