Moederlief Betsie se koffiepatatkoek

Francoise Steynberg Toe ek as koshuiskind naweke plaas toe gegaan het, het ek altyd deur my Moederlief Betsie se resepteboeke geblaai en my bestellings by haar geplaas. “Moederlief, sal Ma asseblief vir my hierdie koekies bak?”Dan het my ma die resep net een kyk gegee en haar eie koekies gebak. Sy is nie een vir resepte slaafs navolg nie. Sy gooi en meng bymekaar wat sy wil, maar dit kom altyd ’n treffer uit.Ek is altyd terug koshuis toe met bakke beskuit, kleinkoekies en koek, en al die ander koshuisbrakke wou saamsmul. Toe ek vir ses jaar in Taiwan gebly het, het my dieet daar hoofsaaklik uit dumplings, biefnoedels en dun soppe bestaan. Ek het voor ek huis toe gegaan het vir my jaarlikse verlof, vir Moederlief laat weet waarvoor ek lus is. Dit was altyd haar lewerkoekies, afval en vaalvleis (skaapvleis saggekook met aartappels en uie in ’n lang, dun sous), suurlemoenstroop, gemmerbier en soetgoed. As ek uit Taiwan by Moederlief aankom, is ek so maer soos ’n kraai, uitgehonger vir boerekos en haar lekker melktert en koek. Sy haat ’n sponskoek, want dit is “te droog”. “’n Koek moet olie kry.” Sy glo ook nie in margarien in kos nie, net botter. Toe Moederlief nog in die Okahandja-distrik geboer het, het sy self haar botter gekarring.As ek op die vliegtuig terug Taiwan toe klim, het ek ten minste vyf kilogram opgetel van al Moederlief se bederf. Ek is geseënd dat Moederlief op haar oudag by my bly en nog meer bevoorreg dat sy elke dag vir my kos maak en so een keer 'n week lekkernye bak. Toe ek onlangs verjaar, vra sy wat ek vir my verjaardag wil hê. Ek bestel ’n koffiekoek. Sy het duisende uitknipsels en resepte in lêers, maar sy kry sowaar nie ’n koffiekoek voor ek verjaar nie. Ek het toevallig lekker oranje patats gekoop en Moederlief besluit sy gaan ’n koffiepatatkoek bak. Sy ontdek ’n patatkoekresep in Wenresepte 5, gee dit een kyk en meng haar eie bestanddele saam. Van my koerantkollegas proe die koek en is in vervoering. Nuusredakteur Ronelle vra of Moederlief vir ’n tuisnywerheid bak. Ek sê nee, maar sy kon as sy wou. Patatkoffiekoek:Bestanddele:550 ml koekmeelblom15 ml bakpoeier1 teelepel kaneel1 teelepel fyn neutmuskaat1 ml soutTwee koppies suiker375 ml sonneblomolie60 ml kookwater3 afgeskraapte teelepels koffiepoeier3 eiers, geskei375 ml geskilde, grofgerasperde rou patats1 teelepel vanieljegeurselMetode:Voorverhit die oond tot 180°C. Spuit ’n koekpan met kleefwerende middel.Sif die koekmeelblom, bakpoeier, kaneel, neutmuskaat en sout saam. Klop die suiker en sonneblomolie goed saam. Laat die koffiepoeier in die kookwater oplos. Voeg die kookwater by die suiker en hou aan klop. Voeg die eiergele en meelmengsel by en roer tot gemeng. Voeg die patats en vanieljegeursel by en meng. Klits die eierwitte tot styf en vou dit liggies met metaallepel in die patatmengsel in. Skep die deeg in ’n koekpan en maak dit gelyk. Bak dit sowat 40 minute op die middelste oondrak tot gaar. Laat die koek in die pan afkoel en keer versigtig op ’n draadrak uit. Koffieversiersel:1 koppie suiker50 ml mielieblom50 ml kakao7 ml koffiepoeier375 ml water45 g (50 ml) botterMeng al die bestanddele saam in die boonste deel van ’n dubbelkastrol. Plaas dit op kokende water en roer aanhoudend tot die mengsel dik is. Laat dit effens afkoel. Smeer die versiersel oor die koek. Die oorskietkoek kan in die yskas gehou word, maar afhangende hoeveel mense aan die koek smul, gaan daar nie sommer oorskiet wees nie.

Moederlief Betsie se koffiepatatkoek

Kommentaar

Republikein 2025-06-24

Meld asseblief aan om kommentaar te lewer

Moederlief Betsie se koffiepatatkoek

Kommentaar

Republikein 2025-06-24

Meld asseblief aan om kommentaar te lewer

MELD AAN

Advertensie