Möller-moordsaak tot Junie uitgestel

Otis Finck - Die afwesigheid van regsverteenwoordiging vir drie van die vyf mans wat in verband met die moord op mnr. Hans Möller in hegtenis geneem is, kortwiek die voortsetting van die verhoor.“Die verskaffing van regshulp aan die aangeklaagdes, Gotlieb Panduleni, Elly Ndapuka Hinavali en Malakia Shiweda, vertraag die verhoor en moet hanteer word. Die ondersoek is voltooi en ek plaas die saak vir regshulp en borgtog op die hofrol,” het landdros John Sindano gister gesê. Hy het die saak teen Panduleni (30), David Tashiya (29), David Shekundja (35), Hinavali (29) en Shiweda (28) tot 15 Junie uitgestel vir regshulp en die indien van pleitstukke. Die uitsteldatum is twee dae voordat dit 'n jaar sal wees ná die aanval op Möller. Die staatsaanklaer, me. Tresia Hafeni, het aan die hof gesê mnr. Dube Mpokiseng, wat Tashiya en Shekundja verteenwoordig, kon weens verpligtinge by die streekhof nie gister se verrigtinge in die landdroshof op Walvisbaai bywoon nie. “Die saak is belangrik en Mpokiseng moet daarom kan verseker hy is beskikbaar met die volgende verskyning van die beskuldigdes in die hof,” het Sindano gemaan. Panduleni het aan die hof gesê hy het om regshulp aansoek gedoen, maar het tot op hede nog nie 'n verwysingsnommer ontvang nie. Hinavali het op sy beurt gesê hy wag vir familielede om sy geboortesertifikaat te bring sodat hy om regshulp kan aansoek doen. Die prokureur wat deur die regshulpraad vir Shiweda aangewys is, is nie meer beskikbaar nie en moet vervang word. Mpokiseng het tydens 'n vorige verskyning van die beskuldigdes in Februarie aan die hof gesê Panduleni en Shiweda het aansoeke om regshulp ingedien, en die regshulpraad was besig om hul lêers uit te sorteer. Hy het voorts gesê Hinavali het sy identiteitsdokument verloor en dat 'n geboorte- of kiesersregistrasiekaart voldoende sou wees om regshulp te bekom. Die beskuldigdes staar aanklagte van moord, poging tot moord (aanranding), huisbraak en gewapende roof in die gesig. Die mans het in boeie onder begeleiding van swaar gewapende polisiebeamptes vir hul hofverskyning opgedaag. 'n Skare met plakkate wat die toekenning van borgtog teenstaan, was weer by die hof teenwoordig. Hafeni het vroeër borgtog teengestaan weens die feit dat die verdagtes 'n vlugrisiko inhou en die erns van die misdade waarvan hulle beskuldig word. Möller is dood nadat hy in die maag geskiet is terwyl hy probeer het om sy vrou, me. Carol-Ann Sowden Möller, en die egpaar se twee kinders, onderskeidelik ses en vier jaar oud, tydens 'n gewapende roof op 17 Junie verlede jaar by hul huis wou beskerm.

Möller-moordsaak tot Junie uitgestel

Kommentaar

Republikein 2026-08-03

Meld asseblief aan om kommentaar te lewer

Möller-moordsaak tot Junie uitgestel

Kommentaar

Republikein 2026-08-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.