Ministerie vrees vergelding oor olifantverkope

Ellanie Smit’n Jaar nadat die ministerie van die omgewing, bosbou en toerisme ’n tender aangekondig het vir die opveiling van 170 Namibiese olifante, sê die ministerie die bie- en vangproses van die 57 olifante wat uiteindelik verkoop is, is amper voltooi. Die ministerie het egter gesê geen inligting gaan bekend gemaak word rakende die bieërs of na watter lande die olifante uitgevoer gaan word nie. Dit uit vrees dat dit die proses kan kniehalter.“Die ministerie is nie in ’n posisie om in hierdie stadium besonderhede oor die veiling bekend te maak nie. Ons sal die besonderhede verskaf op ’n gepaste tyd en wanneer die hele proses voltooi is,” het die woordvoerder van die ministerie, mnr. Romeo Muyunda, gesê. Bespiegelinge is volop dat Namibië die olifante na ’n sekere dieretuin in Dubai in die Verenigde Arabiese Emirate (VAE) gaan uitvoer, terwyl gerugte verlede week die ronde gedoen het dat meer as 20 olifante gevang en by ’n private wildreservaat gehou word. Muyunda het aan Republikein se susterkoerant Namibian Sun gesê dié keer wil die ministerie nie enige name van plekke of persone, bieërs of selfs die lande waarheen die olifante uitgevoer word, bekend maak nie uit vrees vir vergelding van diereregtegroepe. Hy sê weens die omstredenheid wat die olifantveiling sedert die begin oorskadu, vrees die ministerie dié wat betrokke is, kan geteiken word en die proses so belemmer dat bieërs selfs onttrek. “Dis waarom die besluit geneem is om inligting net bekend te maak wanneer die hele proses gefinaliseer is.” Die verkoop van die olifante het wyd reaksie uitgelok, met aanlyn versoekskrifte wat gevra het dit moet gekanselleer word en omgewingsbewaarders wat ook daarteen gekant is. Ten spyte hiervan het die ministerie met die veiling voortgegaan en 57 olifante vir N$5,9 miljoen verkoop. Verskeie klagtes is deur bewaringsgroepe by die Konvensie vir Internasionale Handel in Bedreigde Spesies (Cites) ingedien met bewering dat Namibië nie internasionale wette gehoorsaam nie. Volgens ’n ondersoek deur die Amerikaanse welsynsorganisasie, Animal Survival International (ASI), sal die olifante, insluitend kalfies, waarskynlik na dieretuine en safariparke in die Midde-Ooste gestuur word. Die Al Ain-dieretuin in die VAE het bevestig die dieretuin verwag olifante vroeg aanstaande jaar, maar het nie die olifante se oorsprong aangedui nie. Vorige olifantuitvoere na die VAE het ’n kwarantyntydperk van vyf maande vereis. The Pro Elephant Network (PREN), het gesê verskeie olifant-familiegroepe is reeds in Namibië gevang en is in kwarantyn, gereed vir uitvoer. Die organisasie sê dié olifante sal na alle waarskynlikheid na die VAE uitgevoer word, met ’n Suid-Afrikaanse wildlewe-handelaar wat betrokke is. “Die VAE het nie ’n in-situ bevolking van olifante nie. Die land het reeds wilde olifante van Namibië ingevoer wat in aanhouding gehou word.” ’n Suid-Afrikaanse regsfirma vir omgewingsreg, Cullinan and Associates, wil glo ook ’n regsaksie begin. Die ministerie het die 170 olifante aan die begin van Desember verlede jaar te koop aangebied en het die bieproses op 29 Januarie gesluit. In Augustus 2020 is bekend gemaak dat 57 olifante gevang gaan word om aan onbekende bieërs te verkoop, met 42 olifante wat uitgevoer sal word. Die olifante is van die Omatjetje-gebied (30), die Kamanjab-kommersiële boerderygebied (50), die Grootfontein-Kavango-beesplaasgebiede (60), sowel as die Grootfontein-Tsumkwe-gebied (30). – republikein@republikein.com.na

Ministerie vrees vergelding oor olifantverkope

Kommentaar

Republikein 2025-05-01

Meld asseblief aan om kommentaar te lewer

Ministerie vrees vergelding oor olifantverkope

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie