Minister in sy noppies met NamWater

Yochanaan Coetzee - Indien alles volgens plan verloop, kan die Neckartaldam-projek in die eerste helfte van aanstaande jaar voltooi wees. Sowat N$1,3 miljard sal in die 2017-’18 finansiële jaar vir dié projek beskikbaar gemaak word.Dít volgens mnr. John Mutorwa, minister van landbou, bosbou en water by NamWater, Namibië se waterverskaffer, se jaarvergadering die afgelope Vrydag (15 Desember) in Windhoek.Dié nuus volg nadat die ministerie vir NamWater deur ’n kabinetskomitee van die staatskas om hulp moes nader om kontrakteurs en konsultante wat by die Neckertaldam-projek betrokke is, vir September en Oktober te betaal.Die ministerie het N$155 miljoen uit hul ontwikkelingsbegroting hieraan afgestaan en NamWater het met N$600 miljoen, gewaarborg deur die regering, tot die projek se redding gekom.Die dam se totale koste belooop ’n geskatte N$5,7 miljard. Dit was aanvanklik N$3,2 miljard.Projek noodsaaklikMutorwa dring egter daarop aan dat die damprojek noodsaaklik is vir die land se algehele vooruitgang.“Dit is die eerste dam wat ná onafhanklikwording gebou is en dit sal die Suide se potensiaal vir landbou en groot nywerhede ontgin. Met die regte beplanning kan ons die woestyn groen maak in die komende jare,” het hy gesê.“Selfs die Duitsers het in die vyftigerjare die potensiaal van ’n dam daar raakgesien,” het Mutorwa gesê.“Om ’n volhoubare en gevorderde land te word, moet ons watersekuriteit kan verseker,” het hy beklemtoon.Mutorwa het die wateronderneming ook geprys vir die noodsaaklike rol wat hulle in die land se watersekuriteit speel en het gesê hulle maak ’n groot verskil in die lewens van gemeenskappe wat sonder water moes oorleef, asook aan die land se ekonomie, omdat water aan nywerhede, myne en die landbousektor verskaf word.“Ons wens vir NamWater geluk met wat hulle vanjaar bereik het - en dit in die huidige swaar ekonomiese tye,” het die minister gesê.Onder meer het NamWater vanjaar uitgeblink met projekte soos die Husabmyn se ontsoutingsaanleg, wat met ’n koste van N$450 miljoen NamWater se grootse projek tot dusver was, die Otjimbingwe-pyplyn, asook die twee waterbehandelingstasies op Aussenkehr en Divundu.Om te voorkom dat die sentrale streek droogloop, wat amper in 2016 gebeur het, is ’n verdere N$235 miljoen deur NamWater bewillig vir die opgradering en instandhouding van die infrastruktuur by die waterbronne op Kombat en Berg Aukas, die oostelike waterdraerkanaal, die Omatako- en Von Bachdam. Noodboorgate is ook in en om Windhoek opgerig.“Om sulke groot kapitaalprojekte te bedryf, instandhouding gereeld te doen en ook om ons huise, besighede en boere 24 uur per dag, 365 dae ’n jaar, van water te voorsien is ’n bewys van die instansie se ervare leierskap en toegewyde personeel,” het die minister gesê. “NamWater was en is steeds ’n reddingsboei waarop ons land kan staatmaak,” het hy bygevoeg.

Minister in sy noppies met NamWater

Kommentaar

Republikein 2025-08-06

Meld asseblief aan om kommentaar te lewer

Minister in sy noppies met NamWater

Kommentaar

Republikein 2025-08-06

Meld asseblief aan om kommentaar te lewer

MELD AAN

Advertensie