Minister het Withuis gewaarsku oor Flynn en Russe

Sally Yates, voormalige waarnemende Amerikaanse minister van justisie, sê sy het die Withuis in Januarie gewaarsku dat Michael Flynn – in daardie stadium die nasionale veiligheidsadviseur – gekompromitteer is en kwesbaar is vir Russiese afpersing.Yates het Maandag voor 'n geregtelike subkomitee van die senaat getuig in 'n verhoor wat hoofsaaklik op Flynn fokus en nie veel lig gewerp het op ander aspekte van ondersoeke na bewerings dat Rusland ingemeng het in die Amerikaanse presidentsverkiesing in 2016 en dat daar samespanning was tussen Moskou en pres. Donald Trump se verkiesingsveldtog nie.Yates het na berig word geweier om besonderhede van die ondersoek in 'n openbare forum te bespreek.James Clapper, voormalige direkteur van nasionale veiligheid, het ook getuig en sê hy staan by sy vroeëre standpunt dat hy nie enige bewyse gesien het van sodanige samespanning nie. Hy het ook geweier om kommentaar te lewer op geklassifiseerde aangeleenthede.Yates was 'n kort rukkie aan die stuur van die Amerikaanse departement van justisie totdat Trump haar op 30 Januarie in die pad gesteek het nadat sy geweier het om die reisverbod op sewe Moslem-meerderheidslande te handhaaf.Sy het op 26 Januarie, skaars 'n week ná Trump se inhuldiging, aan Don McGahn, die Withuis se regsadviseur, gesê Flynn het nie die waarheid vertel oor sy kontak met Rusland se ambassadeur in Washington nie.In haar eerste openbare uitlatings oor die aangeleentheid het Yates getuig sy was bang Moskou sou probeer om Flynn af te pers omdat Moskou ook geweet het Flynn was nie eerlik oor sy gesprekke met ambassadeur Sergei Kisliak oor Amerikaanse sanksies teen Rusland nie.Flynn, 'n afgetrede generaal, het die kern van die ondersoeke na die Russe geword. Rusland ontken enige samespanning in die verkiesing en die Trump-administrasie ontken ook enige bewerings van dié aard met Rusland.– Netwerk24/Nampa/Reuters

Minister het Withuis gewaarsku oor Flynn en Russe

Kommentaar

Republikein 2025-08-05

Meld asseblief aan om kommentaar te lewer

Minister het Withuis gewaarsku oor Flynn en Russe

Kommentaar

Republikein 2025-08-05

Meld asseblief aan om kommentaar te lewer

MELD AAN

Advertensie