'Mini-oorlog' in Ludwigsdorf

Tanja Bause – 'n Wilde oor-en-weer skietery het in die vroeë oggendure gister in Ludwigsdorf opgeklink toe 'n groep van sewe mans eers op die polisie en sekuriteitswagte en daarna op ’n lid van die buurtwag geskiet.

“Dit was soos ’n mini-oorlog met sowat twaalf skote wat tussen 02:00 en 03:00 oor en weer gevuur is,” het ’n lid van die buurtwag gesê.

“Die boewe het in die polisiebeamptes en veiligheidswagte in Dr. Kwame Nkrumahstraat opgemerk en begin skiet. Daar is teruggevuur en die boewe het met die Klein-Windhoekrivier afgeloop en in Zieglerstraat op ’n lid van die buurtwag afgekom. Hulle het onmiddellik op hom begin skiet. Hy was gewapen en het terugskiet. Die boewe is toe weer in die rivier in en het daar weggekruip,” het hy gesê.

Lede van die buurtwag en die polisie het die mans agtervolg en om 05:00 die eerste een in die rivier in hegtenis geneem. Om 06:30 het hulle nog een in hegtenis geneem.

“Die tweede verdagte het probeer om ’n rewolwer weg te steek wat ons ook gekry het,” het die man gesê.

“In die meer as 25 jaar wat ons buurtwag al bestaan, is dit die eerste keer dat daar op ons lede geskiet is.”

Volgens die man is ’n saak van poging tot moord deur die buurtwag teen die twee mans aanhangig gemaak.

Daar was volgens die man in die afgelope tyd drie voorvalle waartydens boewe vir inwoners in hul erwe gewag en hulle oorval het.

“In die laaste maand en half het ons 32 misdaadvoorvalle in die woonbuurte van Eros, Ludwigsdorf en Avis gehad. Daar is ’n toename aan gewelddadige misdaad in die gebied. Ons word deur ’n groep gewapende bendelede geterroriseer,” het 'n bron wat verkies om anoniem te bly, gesê.

Volgens die bron is die groep van sowat sewe mans gewapen en skiet hul dikwels eerste op die veiligheidswagte en lede van die buurtwagte.

“Buurtwagte is nie polisiebeamptes nie; hulle is net daar om hul eiendom en inwoners om hulle te beskerm. Hulle help net die polisie.”

Volgens die bron is die samewerking van die Namibiese polisie en die Windhoekse stadspolisie uitstekend.

“Veral die beamptes by die Klein-Windhoek polisiekantoor is baie goed. Hulle is professioneel en altyd gewillig om te help. Die probleem is egter dat die boewe vinnig weer op borgtog vrygelaat word. Ons sien baie van hulle die volgende dag weer op straat.

“Ons word geterroriseer. Jy kan nie net meer by jou huis se inrit inry nie. Jy moet kyk of jy dalk nie agtervolg word nie. Indien wel, ry jy maar weg en ry in die buurt rond tot hulle opgee en gaan dan huis toe. Jy moet die hele tyd op jou hoede wees en bewus van jou omgewing wees. Jy moet kyk of daar vreemde mense op straathoeke staan of vreemde voertuie iewers in die omgewing is.

"En dit word net erger,” het hy gesê.