Minder by Skorpion afgedank

Augetto Graig - Die Mynwerkersunie van Namibië (MUN) het Vrydag 'n belangrike ooreenkoms met die bestuur van die Skorpion-sinkmyn onderteken oor die toekoms van 278 mynwerkers wat by hul mynbou-afdeling afgelê is.Die hoofbestuurder van die myn op Rosh Pinah, mnr. Irvinne Simataa, het by 'n nuuskonferensie Vrydag by die ministerie van arbeid en in die teenwoordigheid van vakbondleiers, asook die minister van myne en energie, mnr. Obeth Kandjoze, aangekondig dat Vedanta, wat die myn besit, ingestem het om 192 werkers te behou. Die mynbou-afdeling se werkers sal nou na Basil Read Namibia gesekondeer word om te help met die kontrakteur se taak om Put 112 vinniger uit te brei. Sowat 22 van die 257 geraakte werkers, wat deel is van die vakbond se onderhandelingseenheid, sal ander poste by Skorpion, wat tans vakant is, volstaan. Net 21 van die werkers wat afgedank sou word, behoort nie aan die vakbond nie. As gevolg van die nuwe ooreenkoms is slegs 43 werknemers nou werkloos, maar Simataa sê die myn sal hulle weer in diens stel as ander werkers vrywillige afleggingspakkette neem en só poste skep. “Prioriteit vir aanstellings sal aan dié 43 werkers verleen word,” het Simataa gesê.Die vakbond het namens Skorpion se mynwerkers ingestem om vir die 2017-'18 finansiële jaar geen verhoging te vra nie en vir 2018-'19 slegs 'n verhoging gebaseer op die verbruikersprysindeks te aanvaar.Simataa het die ooreenkoms as 'n innoverende ontslagdokument beskryf wat die verlenging van die myn se leeftyd moontlik maak. “Die volgende fase van mynontwikkeling by Skorpion is om die Put 112-projek toe te laat om voort te gaan deur die uitkontraktering van mynboubedrywe aan die bekwame mynboukontrakteur Basil Read. Dit het die leeftyd van die myn met nog drie jaar verleng, wat die nodige sekerheid aan ons werkers en die gemeenskap verskaf,” het Simataa gesê. “Die projek sal ook, deur Basil Read, werksgeleenthede vir nog 170 Namibiërs skep,” het hy gesê.Vedanta sal nog geld aan eksplorasie en analise bestee om sodoende die myn se leeftyd ná die volgende drie jaar verder te verleng, het Simataa gesê. Die poging sal ook kyk na die ondergrondse hulpbron onder Put 112, die uitbreiding van die raffinadery om sulfied-erts te behandel, en na die ontwikkeling van Gergarub in vennootskap met Rosh Pinah-sinkkorporasie, het hy gesê.Volgens Kandjoze is die regering verheug oor die ooreenkoms tussen die myn se aandeelhouers en die vakbond. Hy sê Vedanta se eienaar, mnr. Anil Agarwal, het op die regering se versoek self ingegryp - voor die situasie buite beheer raak. Ná vier en 'n half dae se moeilike onderhandelinge is 'n oplossing gevind waarmee alle betrokke partye geluk gewens kan word.MUN se verteenwoordiger, mnr. Peterson Kambinda, het gesê die vakbond het die belange van sy mense op die hart gedra. Hierna het hy met 'n breë glimlag die ooreenkoms amptelik onderteken.

Minder by Skorpion afgedank

Kommentaar

Republikein 2026-05-05

Meld asseblief aan om kommentaar te lewer

Minder by Skorpion afgedank

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.