Minder babas op Nuwejaar as op Kersdag in hoofstad gebore

Tammy Kleinhans en Maria Eiseb - Volgens ’n opname onder hospitale in die hoofstad, is sewe minder babas op Nuwejaar in vergelyking met op Kersdag gebore.
Landwyd is ten minste 83 babas gebore met 28 wat in die hoofstad die eerste lewenslig aanskou het. Die dorp waar die tweede meeste geboortes aangeteken is, is Rundu waar 14 babas gebore is.
Op Keetmanshoop het ’n ma die lewe aan ’n babadogter geskenk en op Mariental is ’n seuntjie en ’n dogtertjie gebore. Op Lüderitz is ’n babadogter gebore en in Walvisbaai se staatshospitaal is ses babas, drie seuns en drie meisies, gebore.
Op Okahandja is drie babas gebore van wie twee meisies en een ’n seun is. In die kraamsaal van die staatshospitaal op Grootfontein is drie seuns en een meisie gebore. By die staatshospitaal op Swakopmund is een baba gebore en op Rehoboth is twee seuns en een meisie gebore.
In die kraamsaal van die staatshospitaal op Oshakati is tien geboortes (ses seuns en vier meisies) aangeteken. Op Outapi is drie seuns en ses meisies gebore en op Tsumeb is ’n meisie die enigste baba wat op dié dag gebore is.
Voorts berig Nampa dat 28 babas op dié dag in die hoofstad gebore is. By die Katutura-staatshospitaal is 12 babas (vier meisies en agt seuns) gebore. Drie stelle tweelinge was ook op die dag gebore. By die Windhoek Sentrale Hospitaal is agt seuns en een meisie gebore. By die Rhino Park Hospitaal is sewe babas gebore van wie vier seuns en drie meisies is.