Miller weer gunsteling; vroueresies lyk oop

Die Namibiese Fietsryfederasie en Nedbank se nasionale veldresies-bergfietskampioenskap vir 2021 vind Saterdag by IJG Trails in Kleine Kuppe plaas.Kategorieë sal wissel van onder-12 tot elite, en fietsryers sal oor verskillende afstande oor die rotsagtige, kronkelende landskap meeding. In die nasionale wedloop sal Namibiese fietsryers meeding om punte te verwerf om hul wêreldrangpunte aan te vul, wat die belangrikste bepalende faktor vir fietsryers is om aan internasionale byeenkomste deel te neem, soos die onlangse Olimpiese Spele of volgende jaar se Statebondspele in Birmingham. Die jong Olimpiese debutant Alex Miller (20) sal as die verdedigende titelhouer een van die noemenswaardige aanspraakmakers wees wat na die plaaslike XC-reeks terugkeer ná sy tipiese vasbytvertoning vir 'n 31ste posisie by die Olimpiese Spele in Tokio 2020.Miller het verlede jaar dié nasionale trui ingepalm deur die ses baanrondtes sowat drie minute vinniger as sy groot plaaslike uitdager Tristan de Lange voltooi. Laas naweek het Miller met Hugo Hahn as sy spanmaat die wenspan in die tweedaagse Otjihavera Experience naby Otjiwarongo gevorm. Hierteenoor is De Lange (ook 'n Olimpiër in Tokio 2020) die laaste tyd in die Wes-Kaap saam met sy beroepspan Imbuko Giant bedrywig en die aanduiding is dat hy nie komende naweek in Windhoek sal meeding nie.In die vrouekompetisie het Michelle Vorster die 2020-titel ingepalm, maar die tweemalige Olimpiese ryer het intussen na Nieu-Seeland verhuis en die gesogte titel sal dus uitgespook word tussen 'n groepie sterk moontlike kandidate, insluitend Gabriella Raith, Courtney Liebenberg, Nicola Fester, Irene Steyn en Carmen Johannes.'GEESDRIF VAN TOESKOUERS'Nedbank Namibia se woordvoerder, Gernot de Klerk, beklemtoon die prominensie van die ontwikkeling van die opbouende fietsry-kultuur in Namibië. “Ons beskou onsself as bevoorreg om 'n uitstekende rol te speel in die ontwikkeling van die sport,” sê hy. “Ons sal Saterdag nasionale kampioene bekroon en dit op sigself is altyd 'n geleentheid om te vier.”Die Rock & Rut bergfietsklub se koördineerder Marion Schonecke moedig sportgeesdriftiges aan om fietsrybyeenkomste by te woon om die ryers te ondersteun en te motiveer om hul heel beste te doen.“By die meeste van ons byeenkomste het ons toeskouers by die byeenkomste, maar ons moedig tog die publiek aan om veral by groot geleenthede soos hierdie agter ons fietsryers te staan. “As ons voortdurend ons fietsryers ondersteun, sal hulle die land met trots verteenwoordig in die wete dat die nasie agter hulle is. Dis 'n konstruktiewe sielkundige motivering wat uiteindelik bydra dat ons fietsryers ook internasionaal presteer,” het sy bygevoeg.Die Namibiese Fietsryfederasie, die beheerliggaam wat die nasionale kampioenskappe oor verskillende fietsrydissiplines verteenwoordig, sal sorg dat die Covid-protokol deurentyd nagekom word. Die wedrenne begin op afsonderlike tye vir die verskillende kategorieë, sodat deelnemers nie die Covid-gereguleerde limiet van 100 per groep oorskry nie.Belangstellende fietsryers kan steeds vir die geleentheid registreer deur die Rock & Rut webwerf te besoek. Die kategorieë strek inderdaad vanaf onder 12 (seuns en meisies) tot grootmeesters van onbeperkte ouderdom.Vir meer inligting en registrasie vir die Nedbank Rock & Rut-reeks van veldresiese kan Marion Schonecke by info@rockandrut.org gekontak word.

Miller weer gunsteling; vroueresies lyk oop

Kommentaar

Republikein 2025-12-17

Meld asseblief aan om kommentaar te lewer

Miller weer gunsteling; vroueresies lyk oop

Kommentaar

Republikein 2025-12-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.