Miljoene vir ARV's

Henriette LamprechtSowat die helfte van die 19 bieërs om die winsgewende tender vir die verskaffing van antiretrovirale middels (ARV's) aan die staat is buitelanders – meestal van Indië.Die betrokke tender (G/OIB/CPB-01/2018) is 'n heruitreiking van die Sentrale Verkrygingsraad (CPB) se eerste en enigste openbare tender wat verlede jaar uitgereik is. Dit is egter in April vanjaar in ooreenstemming met 'n bepaling van die Openbare Verkrygingswet gekanselleer, wat bepaal 'n openbare entiteit mag die bie-proses voor die aanvaarding van botte kanselleer “sou dit nie die verwagte uitkoms skep of bereik nie”.Volgens die jongste tenderbulletin het die CPB se bestuurseenheid vir verkryging (PMU) namens die ministerie van gesondheid en maatskaplike dienste (MoHSS) vir “oop, internasionale botte” gevra.Ten minste nege van die huidige 19 bieërs is buitelandse maatskappye, waarvan baie volgens die bulletin plaaslike agente blyk te hê. Sommige het egter botte van hul eie ingedien. Van die farmaseutiese maatskappye wat botte ingedien het, sluit onder meer die Namibiese farmaseutiese maatskappy Nampharm in met N$113,7 miljoen (BTW uitgesluit). Die betrokke bedrae wissel van 'n skamele N$7,4 miljoen (Shipanga Medical Services) en N$20,9 miljoen (Dore Pharmaceuticals) tot N$270,3 miljoen (African Medical Trading/Earth Medical & Pharmaceutical JV) en Adesso Healthcare Supplies (USA) se N$368,5 miljoen.Volgens die tenderbulletin het die ministerie van gesondheid weke ná die betrokke tender in Augustus geadverteer is, ook 'n versoek vir die noodaankope van ARV's en TB-medisyne op sy webtuiste geadverteer. Die dokument was volgens die bulletin net op 25 September op die webtuiste beskikbaar en die tender was vir 15 items van verskeie hoeveelhede. Net vervaardigers of handelaars in farmaseutiese produkte wat wettig geregistreer is en geldige vervaardigings- of handelslisensies in Namibië het of wat andersins wettiglik gespesifiseerde items mag uitvoer, is toegelaat om botte vir die noodaankope in te dien. Die spesifieke items moes ook ten volle aan die Beheerwet op Medisyne en Verwante Middels (MRSCA) se vereistes voldoen. Die laaste gewone tender vir die verskaffing van ARV's vir die CMS is in Maart 2014 deur die ministerie onder vrystelling van die tenderraad uitgereik. Volgens die tenderbulletin is 11 botte toe ontvang en is die proses deur “ernstige tekorte” aan medisyne by staatshospitale en –klinieke te midde van aantygings van korrupsie en nepotisme gevolg. In Julie 2014 het die ministerie aangekondig vyf maatskappye sou ARV's voortaan aan die staat verskaf sonder om ooit die name van die betrokke leweransiers bekend te maak. Twee jaar later moes die ministerie bontstaan om sy aankope (met vrystelling van normale tenderprosedures) van N$64 miljoen se ARV's van Cipla Quality Chemical, wat in Uganda gebaseer is, te verdedig. Die destydse permanente sekretaris, dr. Andreas Mwoombola, het toe gesê die tenderraad het die ministerie 'n jaarlikse vrystelling van tenderprosedures vir noodsaaklike aankope gegee, met noodmedisyne en ander items wat hierby ingesluit was. Die ministerie het vandeesmaand ook kwotasies vir die verskaffing van farmaseutiese uitkope vir die Windhoek Sentrale Hospitaal versoek. Items sluit onder meer verbande, oogjel, medikasie vir blaasprobleme en pynmedikasie in.

Miljoene vir ARV's

Kommentaar

Republikein 2026-02-05

Meld asseblief aan om kommentaar te lewer

Miljoene vir ARV's

Kommentaar

Republikein 2026-02-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.