Meteoorreën bereik vanaand sy piek

Elvira HattinghTerwyl die Geminides-meteoorreën vanaand sy piek sal bereik, kan sterreliefhebbers hulle vandeesmaand ook verlustig in Venus, Saturnus en Jupiter wat helder net ná sononder sal skyn. Die Suid-Afrikaanse Astronomie Observatorium sê die Geminides-meteoorreën, wat een van die mees skouspelagtiges in Suider-Afrika is, moet vanaand tussen 23:30 en 03:00 dopgehou word – mits die weer dit toelaat. Die meteoorreën word deur die klipkomeet 3200 Phaethon veroorsaak – ‘n voorwerp waaroor wetenskaplikes kopkrap, omdat dit nie uit ys bestaan, soos gewoonlik die geval met komete is nie. Tog raak dit helderder soos dit nader aan die son beweeg – iets wat weer tipies van komete is. Boonop het dit ‘n stert, wat puin agterlaat wat die Geminides-meteoorreën veroorsaak.Die meteoorreën is reeds vanaf 4 Desember aktief en sal nog tot 16 Desember gesien kan word. Daar moet in ‘n noordnoordoostelike rigting, naby die Gemini- of Tweeling-sterrebeeld vir verskietende sterre gesoek word. Volgens die observatorium is drie meteoorreëns aktief in Desember, alhoewel die Phoenicides-meteoorreën reeds op 9 Desember tot ‘n einde gekom het. Die Puppid-Velids-meteoorreën duur vanaf 5 Desember tot 7 Januarie en sal sy piek op 29 Desember bereik. Laasgenoemde sterrereën is die sigbaarste tussen 22:30 en 03:30 in die rigting van die Puppis- of Agterskip-sterrebeeld en die Seil Vela- of Seil-sterrebeeld.PLANETEDie observatorium sê Venus, Saturnus en Jupiter sal gedurende die hele Desember vroegaand helder in die Weste skyn, terwyl elk van die planete verlede week tot digby die maan verbybeweeg het. Die rooi planeet, Mars, sal ook teen die einde van die maand vroeg in die oggend in die rigting van die Skerpioen-sterrebeeld sigbaar wees. EarthSky.org sê Mars kon die afgelope maande nie vanaf die aarde gesien word nie omdat dit agter die son was. Dit maak vandeesmaand weer vir die eerste keer sy verskyning en sal al helderder word, totdat dit ‘n jaar van nou, in Desember 2022, baie duidelik sal wees. Daarbenewens sal Mercurius, die kleinste planeet in die sonnestelsel wat oor die algemeen moeilik sigbaar is, teen die laaste week van Desember in die Weste, net ná sononder, met spesiale toerusting gesien kan word. Jupiter, die grootste planeet in ons sonnestelsel, het sy verskyning naby die maan op 9 Desember gemaak en sal deurlopend naby die Waterdraer-sterrebeeld (Aquarius) gesien kan word, met Venus wat naby aan die Boogskutter-sterrebeeld (Sagittarius) gesien kan word. Die planeet het ook op 7 Desember digby die maan verbygeskuif. Saturnus is naby die Steenbok-sterrebeeld (Capricornus) geleë en het ook op 8 Desember tot naby aan die maan beweeg. - elvira@republikein.com.na

Meteoorreën bereik vanaand sy piek

Kommentaar

Republikein 2026-02-04

Meld asseblief aan om kommentaar te lewer

Meteoorreën bereik vanaand sy piek

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.