Meroro en Shihepo verloor beide in Gauteng

Andrew Poolman - Twee Namibiese vegters in die junior swaargewigklas (90.7 kg) moes Sondagaand die knie buig in afsonderlike gevegte teen Suid-Afrikaanse opposisie.Vikapita Meroro het met reg baie kritiek van sy landgenote verduur vir sy swak kondisionering en pap vertonings in 2017 teen Kevin Lerena en Maksim Wlasof, wat hy beide met uitklophoue verloor het.Op 34-jarige leeftyd het hy Sondagaand in Randburg 'n veel meer vasberade vertoning teen Suid-Afrika se WBA Afrika-titelhouer Akani Phuzi gelewer en het die geveg vir die volle tien rondes voltooi, hoewel Phuzi gerieflik met punte gewen het.Phuzi het Meroro in die agtste ronde met 'n linkerhaak-teenhou platgeslaan, maar die Namibiër het dadelik opgestaan en was enduit oop vir besigheid om houe uit te ruil. Meroro, veel leniger om die middellyf as in ander onlangse verskynings, het nietemin gesukkel om werklike skade aan te rig teen die Suid-Afrikaner met die langer arms en wie se verdedigingstyl ontwykende beweging van die bolyf ingesluit het.Volgens die beskouing van die drie Suid-Afrikaanse tellinghouers Lourens Ellis, Mfundo Mvandaba en Cyphrial Ndaba het die tuisbokser bykans elke ronde gewen, met hul tellings onderskeidelik 99-90, 98-90 en 96-92.Phuzi se vorige geveg was teen nog 'n Namibiër, Willbeforce Shihepo, vir wie hy in Juniemaand ook op twee uit drie tellinghouers se kaarte met punte verslaan het. Phuzi, afgerig deur Alan Toweel en nou onoorwonne ná tien gevegte, is 'n belowende vegter, maar het Sondagaand met tye gelyk of hy oorversigtig is, het Michael Green vir Netwerk24 geskryf.Meroro se beroepsrekord het teruggesak tot 29 gewen en agt verloor. SHIHEPO BUIG KNIEShihepo het hom Sondagaand in Time Square in Pretoria vasgeloop in 'n nederlaag met 'n tegniese uitklophou in drie rondes teen die gedugte Suid-Afrikaner Thabiso (The Rock) Mchunu.Die bonkige en gespierde Mchunu (nou 21-5, met 13 uitklophoue) beweeg reeds sedert 2013 op die hoër vlakke van die junior swaargewigafdeling, vandat hy sy eerste oorwinning in Amerika teen Eddie Chambers behaal het. Van die beste oorwinnings in sy loopbaan sluit in die Nigeriër Olanrewaju Durodola (17 gewen, een verloor) in 2014, sy landgenote Johnny Muller en Tommie Oosthuizen, teen wie hy laas Desember 'n vorige nederlaag gewreek het.Selfs in Mchunu se nederlae, soos teen dié gewigsklas se onbetwiste koning Oleksandr Usyk van Oekraïne in 2016, het hy gewys dat hy vir niemand skrik nie.“Mchunu was nie eens werklik gevaarlik nie en dit was Willbeforce wat meer aggressief begin het en met goeie houe getref het. Ek was verbaas dat Force ná die derde ronde gesê hy voel swak en dat hy nie verder wou veg nie. Net hy sal werklik weet,” sê Imms Moses, wat die afrigter in sy hoek was.Vir Shihepo was dit reeds sy twaalfde nederlaag in die beroepskryt, waar hy ook 25 keer aan die wenkant was (18 uitklophoue). • Noudat Shihepo en Meroro hulle in dieselfde gewigsklas bevind, kan die vraag gevra word of die tyd nie aangebreek het om 'n ontmoeting in dieselfde kryt te reël nie?Beide is nie meer aanspraakmakers om op wêreldvlak mee te ding nie, nadat hulle as destydse Afrika-titelhouers reeds sulke geleenthede in hul jonger dae deur hul vingers laat glip het. Die promotors van só 'n Namibiese geveg behoort nietemin min moeite te ondervind om dit winsgewend aan te bied. EXECUTIONER IN KAZAKSTANWalter Kautondokwa (The Executioner) se ambisie om weer onder die beste middelgewigte ter wêreld getel te word, kom Saterdagaand voor 'n groot toets te staan.Die Namibiër met sy afrigters Nestor Tobias en Joseph Antindi het reeds die afgelope Vrydag na Kazakstan vertrek, waar hul botsing teen dié land se ambisieuse en onoorwonne Kanat Islam (26-0) die naweek in Almaty voorlê.Die Wêreldboksorganisasie (WBO) se internasionale middelgewiggordel sal vir die wenner op die spel staan.Kautondokwa het 18 uit 19 beroepsgevegte gewen, waarin hy 17 teenstanders uitgeslaan het. Die enigste klad op sy rekord was in 'n vakante wêreldtitelgeveg in Amerika teen die huidige WBO-kampioen, Demetrius Andrade.

Meroro en Shihepo verloor beide in Gauteng

Kommentaar

Republikein 2025-05-05

Meld asseblief aan om kommentaar te lewer

Meroro en Shihepo verloor beide in Gauteng

Kommentaar

Republikein 2025-05-05

Meld asseblief aan om kommentaar te lewer

MELD AAN

Advertensie