'Menstruasie 'n natuurlike proses'

Henriette Lamprecht - Namibië het verlede week vir die eerste keer die internasionale dag vir menstruele gesondheid en higiëne en wel op Gobabis gevier.Dit het ten doel om beleidsrigtings en programme te ontwikkel om maatskaplike, ekonomiese en kulturele struikelblokke in die pad van veilige en waardige menstruele gesondheid en higiëne uit die weg te ruim. Volgens die adjunkminister van gesondheid en maatskaplike dienste is dit die ideale platform om verwante rolspelers daaraan te herinner dat Namibiese meisies waardige, veilige en private geriewe en produkte moet hê om met vertroue met hul daaglikse aktiwiteite tydens menstruasie voort te gaan. “Wanneer meisies nie voldoende sanitasiegeriewe of sanitêre doekies het nie of maatskaplike taboes oor menstruasie in die gesig staar, word hulle van geleenthede ontneem om vry en gemaklik aan skool- en ander aktiwiteite deel te neem,” het me. Juliet Kavetuna gesê. In Namibië het vroue en meisies wat in armoede leef, nie altyd toegang tot sanitêre doekies nie en moet dikwels onhigiëniese en onvoldoende materiaal gebruik wat tot siektes en infeksies kan lei. Slegs 17% van vroue en meisies in landelike gebiede het toegang tot verbeterde sanitasiegeriewe wat hulle van die privaatheid en infrastruktuur ontneem vir die gesonde, veilige en higiëniese bestuur van hul menstruasiesiklus. Volgens ’n opname in 2014 deur die Gemeenskap vir Gesinsgesondheid het slegs 29% van skole spoeltoilette gehad. Meer as ’n kwart van meisies (28%) gebruik toiletgeriewe wat nie van dié van seuns geskei is nie, terwyl meer as die helfte van skole (51%) geen voorsiening maak vir meisies wat menstrueer nie of drommetjies vir sanitêre doekies het nie. “Meisies raak skaam en gespanne tydens hul siklus en baie verkies om eerder tuis te bly omdat hulle nie die regte geriewe en produkte of selfs inligting het om dit op ’n waardige manier te bestuur nie. Dit is om dié rede hoekom dit vir ons moeilik is om terug te sit, terwyl dit die lewe van jong meisies beïnvloed,” het me. Sanet Steenkamp, permanente sekretaris van onderwys, kuns en kultuur, tydens dieselfde geleentheid gesê.“Die regering, gemeenskappe en families moet aangemoedig word om die jong meisie met inligting, geriewe en produkte te ondersteun,” het sy gemaan. In sekere kulturele groepe in Namibië bly menstruasie taboe en word dit dikwels met vuilheid en skande geassosieer. Binne dié kulturele konteks word vroue en jong meisies tydens menstruasie in afsondering gedwing, terwyl ouers nie gemaklik is om inligting hieroor met hul dogters te deel nie. “Om hieroor te praat, moenie mense ongemaklik of verleë maak nie. Die dag help daarom om die stilte wat die onderwerp omhul, te verbreek en om bewustheid te bou oor ’n normale, belangrike stadium van puberteit by meisies,” het die Verenigde Nasies se inwonende koördineerder, me. Rachel Odede, gesê.“Wanneer ons openlik en positief daaroor praat en wanneer beleidsrigtings en geriewe vir menstruele gesondheid en higiënebestuur ingestel is, word jong meisies bemagtig om te weet daar is geen beperkings op hul daaglikse aktiwiteite en lewe tydens hul siklus nie,” het sy gesê.Tans is die regering besig met pogings om die gapings in menstruele gesondheid en higiëne te takel as een van die strategieë om die volhoubare ontwikkelingsdoelwitte vir onder meer gesondheid te verwesenlik. Onder die vaandel van die nasionale taakmag vir skoolgesondheid probeer die regering verseker dat inligting, geriewe, dienste en produkte, ingesluit dié wat met menstruasiebestuur verband hou, geredelik in alle Namibiese skole beskikbaar gestel is.Die regering het voorts hande gevat met Unicef in die vestiging van bestuursklubs vir menstruele higiëne as deel van die sanitasieprogramme by skole. Deur middel van dié klubs waarvan 52 tot op hede gestig is, word beide meisies en seuns toegerus met kennis oor menstruasie en bemagtig met feite oor die natuurlike proses, terwyl mites en taboes ook afgebreek word. Dit het reeds tot verminderde afwesigheid onder jong meisies by die betrokke skole gelei, terwyl riglyne ook geskep is om die stigma rondom menstruasie af te breek. ’n Jeuggebaseerde organisasie, Afriyan, het ook ingespring en sanitêre doekies van VN-agentskappe, FNB Namibia en Afriyan-lede ingesamel wat onder meer aan 1 500 skoolmeisies versprei sal word.

'Menstruasie 'n natuurlike proses'

Kommentaar

Republikein 2025-07-16

Meld asseblief aan om kommentaar te lewer

'Menstruasie 'n natuurlike proses'

Kommentaar

Republikein 2025-07-16

Meld asseblief aan om kommentaar te lewer

MELD AAN

Advertensie