Mens-dier-konflik in die kollig

Francoise Steynberg - Mens-dier-konflik is onder die soeklig van die ministerie van die omgewing en toerisme met ''n nasionale slypskool wat einde November in die hoofstad aangebied gaan word om die beleid te hersien.Volgens ''n verklaring deur die minister, mnr. Pohamba Shifeta, word streekkonsultasies oor ''n konsepbeleid van die hersiene nasionale beleid oor mens-dier-konflikbestuur en aksieplan reeds gehou. Tydens die slypskool in Windhoek sal maatreëls ingestel word om die beleid te finaliseer. "Die ministerie erken dat mens-dier-konflik van verskeie spesies landwyd in Namibië toeneem. Die groot probleme vind op kommunale grond plaas waar die meeste olifante en roofdiere buite beskermde gebiede gevind word en waar skade en verliese deur mense gely word wat dit die minste kan bekostig," het die minister gesê."Hierdie konflik vind ook plaas waar mense en wilde diere met mekaar moet saamleef en dit sal in die toekoms voortduur. Dit beteken dat dit nie moontlik is om konflik uit te wis nie, maar dat konflik op die mees doeltreffende maniere bestuur moet word."Shifeta sê hoewel die ministerie beskuldig word dat dit niks aan dié saak doen nie, die ministerie wel meer bronne en tyd hieraan bestee om die impakte van mens-dier-konflik te verminder. "Amptenare van die ministerie landwyd en veral in die Kunenestreek waar die meerderheid konflikte voorkom, werk nóú saam met boere en gemeenskappe om die situasie onder beheer te bring," het Shifeta gesê en verwys na vier olifante wat in die Kamanjab-Fransfontein-omgewing in samewerking met die private sektor van nekbande voorsien is. Hy het die Namibië Landbou-unie, Loxodonta Africana-bewaringsgebied, N/a''an ku sê-stigting, Namibia Breweries Limited en die Kamanjab-boerevereniging vir die nekbande bedank. "Boere in die gebied het nog twee nekbande voorsien wat binnekort aan olifante vir monitering aangebring sal word en die data word daagliks met die Kamanjab Boerevereniging gedeel," het Shifeta gesê.Voorts gaan die ministerie ''n olifantsensus onderneem in die Noordweste, die Kamanjab-omgewing ingesluit, asook die Erongo- en Omusatistreek om olifantverspreiding en -digtheid te verstaan. LEEUKONFLIKShifeta meen ook gereelde konflik met leeus kom voor in dele van die Kunenestreek waar mense met hul vee in wildgebiede en die Palmwag- en Hobatere-toerismekonsessiegebied weens droogte ingetrek het."Pogings is deur die ministerie, nie-regeringsorganisasies, toerismemaatskappye en bewaringsgebiede aangewend om te voorkom dat leeus in sulke konflik gedood word. Dit is een van die spesiale gevalle in Afrika waar ''n leeubevolking na buite ''n beskermde gebied uitbrei," het Shifeta gesê."Groot pogings word aangewend om elke leeutrop van nekbande te voorsien en hulle te monitor, asook roofdierheinings op te rig waar vee oornag gehou kan word. Meer bronne word egter hiervoor benodig."Die minister sê mens-dier-konflik, asook renoster- en olifantstropery is die twee groot prioriteite van die ministerie. "Dit is ons hoop dat met die vestiging van ''n wildbeskermingsdiens wat as die teenstropery-eenheid bekend staan, ons toegewyde personeel sal hê om kwessies soos wildbeskerming te hanteer, asook ''n spesieke personeelkorps vir mens-dier-konflikbestuur."Streekkonsultasies vind plaas in die Zambezistreek op Katima Mulilo op 27 September; op Ndiyona in Kavango-Oos op 28 September; op Nkurenkuru in Kavango-Wes op 29 September; op Gobabis in Omaheke op 3 Oktober; op Omatjete in Erongo op 10 Oktober; en op Mariental vir die Hardap- en //Kharasstreek op 14 Oktober.

Mens-dier-konflik in die kollig

Kommentaar

Republikein 2025-05-01

Meld asseblief aan om kommentaar te lewer

Mens-dier-konflik in die kollig

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie