Meesters na wêreldtoernooi in Kaap

Andrew Poolman’n Opgewonde groep spelers vertrek vanoggend uit Windhoek na Kaapstad vir deelname aan die Wêreldbeker kriekettoernooi vir 50 jaar en ouer.Die wêreldtoernooi word maar vir die tweede keer aangebied, ná die 2018-weergawe in Australië wat deur die gasheerland gewen is. Die toernooi is intussen vanaf agt tot 12 spanne uitgebrei om ook uitnodigings aan Namibië en Zimbabwe in te sluit.Die Namibiese uitnodigingspan staan onder kapteinskap van Lennie Louw, die voormalige draaibouler wat ook vir jare kaptein van die nasionale span was.Louw is een van drie spanlede wat in hul jonger dae Namibië in sy enigste verskyning by die Wêreldbeker-eendagtoernooi in Suid-Afrika verteenwoordig het. Die ander twee is die kolwer Gavin Murgatroyd en paaltjiewagter Melt van Schoor.Manne soos Gielie Vermeulen en Etienne Brits (aanvangskolwers) asook Trevor Britten (draaibouler en kolwer) het ook in hul jonger dae die Namibiese spanne van die 1990’s of vroeër verteenwoordig.Dee Thakur, wat tot verlede seisoen afrigter van die nasionale span was, tree as speler en afrigter op. Die gebore Wes-Indiër het sedert hy na Namibië geïmmigreer het vele klubwedstryde vir CCD Tigers gespeel.Daneel van der Walt (uitvoerende lid van Krieket Namibië), Willie van Zyl (oudspeler van Walvisbaai-krieketklub), Louis Nortjé (CCD Tigers), Basie Buitendag (oudskrumskakel van SWA/Namibië wat Noord-Transvaal se Afrikaanse skolespan gehaal het), Francois Erasmus (Wanderers en Namibië), Ashley Griffiths (Unam en Namibië-uitnodigingspan) en Zafar Muhammad (Zebras) voltooi die spelersgroep van die uitnodigingspan. Die spanbestuurder is mnr. Leeba Fouché.Om die uitnodigingspan saam te stel, was om verskeie redes glad nie ’n eenvoudige taak nie. Dit het ’n bietjie raap en skraap gekos om genoeg kwalifiserende spelers te vind wat nog fiks en vaardig is om hulle aan só ’n uitdaging te onderwerp. Die toerkoste was ook ’n faktor, omdat spelers vanweë die afwesigheid van ’n begroting hiervoor deur die sport se nasionale beheerliggaam maar self reëlings moes tref.“Die tydsberekening vir ons debuuttoernooi is sodanig dat heelwat van die 2003 Wêreldbeker-span dalk oor twee jaar sal kan begin kwalifiseer vir die 50-plusspan,” sê Erasmus, wat vir die destydse toer die spanbestuurder was.“Ideaal gesproke kan hierdie toer die beginpunt wees vir Namibië om ook ’n liga vir spelers van 50-plus tot stand te bring, soos die geval is in van die lande teen wie ons gaan meeding.”Die Namibiërs ding in groep B mee, terwyl groep A uit Sri Lanka, Zimbabwe, Wes-Indië, Kanada, Nieu-Seeland en die verdedigende kampioen Australië bestaan.’n Taai wedstrydskedule lê vir die Namibiërs in die Wes-Kaap voor, wat wegspring met ’n botsing môre teen Pakistan. Die program:Woensdag 11 Maart: teen Pakistan (WP-krieketklub, Vineyard)Vrydag 13 Maart: teen Wallis (Reddam House-skoolveld)Sondag 15 Maart: teen Engeland (WP-krieketklub, Wally Wilson)Maandag 16 Maart: teen Indië (Groot Drakenstein-krieketklub)Woensdag 18 Maart: teen Suid-Afrika (Rondebosch-krieketklub)Vrydag 20 Maart: semifinale en uitspeelwedstryde vir posisies.Sondag 22 Maart: uitspeelwedstryde vir posisies.Maandag 23 Maart: plaatfinaal en bekerfinaal.BORGE TREE TOEFNB Namibia het as hoofborg van die toer na vore getree, met die oorhandiging van N$100 000 tot die toerkoste. Klerasie vir die span is deur AB InBev Namibia geborg.Laasgenoemde borgskappe is tydens ’n afskeidgeselligheid verlede week oorhandig. Maatskappye het ter ondersteuning tafels gekoop, terwyl ’n bykomende N$130 000 deur die opveiling van meestal geborgde reisnaweke ingesamel is.Afgesien van hul oefensessies by Wanderers-klub het die groep ter voorbereiding ook twee naweke gelede ’n opwarmwedstryd by die WHS-veld teen ’n hoëprestasiegroep van Krieket Namibië gespeel. Spelers soos Michau du Preez, Lo-han Louwrens en Danie van Schoor het in laasgenoemde span gespeel, wat te sterk vir die 50-plusspan was, maar wat as ’n waardevolle oefenlopie gedien het.• Regstreekse videostroom van alle wedstryde kan op pitchvision.com gevolg word.

Meesters na wêreldtoernooi in Kaap

Kommentaar

Republikein 2025-06-18

Meld asseblief aan om kommentaar te lewer

Meesters na wêreldtoernooi in Kaap

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie