Meer reën kom oor groter Namibië

Elvira Hattingh - Swaar reën word nog vir vandag oor die Noordweste, sentrale en suidwestelike dele van die land voorspel met ‘n moontlikheid van kitsvloede. Die Namibiese weerkantoor se hoofweervoorspeller, mnr. Odillo Kgobetsi, het gister aan Republikein gesê kitsvloede kom dikwels voor waar die grond reeds nat is en dit meer as 50 mm op ‘n slag reën. Donderstorms asook haelstorms word verwag.Terselfdertyd sal donderstorms na verwagting oor die kusgedeeltes voorkom.‘n Waarskuwing vir swaar reën is ook vir vandag vir die suidelike en suidwestelike dele van die land, soos Oranjemund en Noordoewer, uitgereik. Volgens Kgobetsi is dit vanweë ‘n diep laedrukstelsel, wat eers oor die Atlantiese Oseaan gehang het, wat nou nader aan Namibië beweeg het en baie vog bevat. Môre sal die weer in ‘n mate oor die verre Weste en Suidweste opklaar, maar elders word nog baie reën verwag. Dit sal ook die derde dag wees dat swaar reënneerslae vir die binneland en Noordweste voorspel word.Saterdag sal die weer oor die Weste en Suidweste opklaar, maar kan dit steeds nog op ander plekke in die land reën.Die Nasionale Sentrums vir Omgewingsvoorspelling dui ook aan dat goeie reën landswyd tot 9 November kan voorkom, waarna dit meer na die noordooste van die land toe kan oorskuif. Oor die algemeen lyk reënvooruitsigte oor die komende twee weke ietwat belowend.Volgens die weerkantoor se amptelike rekords het dit tussen Dinsdag 08:00 tot Woensdag 08:00 op die plaas Heimat naby Karasburg die meeste (55 mm) gereën. By die Internasionale Lughawe Hosea Kutako het dit 19,8 mm gereën.By Eros is 14 mm gemeet en by die weekantoor se hoofkwartiere 10,4 mm. Sesfontein het 9,9 mm ontvang, Omutheya 11,8 mm. Oshikango het 5,2 mm gehad. Walvisbaai het ook 1,4 mm reën ontvang. Op Facebook is foto’s geplaas van Finkenstein se riviere wat Dinsdag begin loop het, terwyl ander gistermiddag gesê het dit reën op Tsumeb, Otavi, Otjiwarongo, Outjo, Okahandja en Walvisbaai.In die Omaruru-omgewing is gisteroggend 70 mm gemeet, terwyl Aranos 30 mm gehad het, sê James Pieters op die Facebook-blad Reën in Namibië.Philip Deetlefs het 16 mm in Avis gemeet, terwyl Bianca Seager sê 65 mm reën het Dinsdag op Finkenstein geval. Op plase in die Mariental-omgewing het Dinsdag tussen 9 mm en 36 mm gereën, terwyl hulle Sondag ook reën ontvang het.Gobabis het ook Dinsdag sowat 30 mm reën gekry.Intussen berig Des Erasmus uit Swakopmund die klein reënseisoen het vir dele van die Erongostreek soos ‘n dief in die nag gekom met Omaruru wat gisteroggend sopnat opgestaan het. Swaar donderweer het in die nag langs die sentrale kus oor die see gewoed, maar die dorpe Hentiesbaai, Swakopmund en Walvisbaai het net druppels gehad.Tussen Swakopmund en Walvisbaai het dit wel harder gereën op die dorpsuitbreiding Dolfynstrand. Suid van Walvisbaai het dit sedert die naweek hard in die woestyn gereën met groot plasse water wat by ‘n dienssentrum op Solitaire gestaan het. Die reënweer het strepe getrek met waarskuwings wat gisteroggend oor nat toestande op sekere grondpaaie uitgereik is. Vreemde toestande op see het tot gisteroggend voortgeduur. Gisteroggend het die kreefseisoen begin, maar net ná laagwater was daar nie ‘n enkele kreefduiker by die gewilde rotsvelde net suid van Swakopmund nie. By die Voëleiland net noord van Walvisbaai het toestande ook genormaliseer nadat tonne pelsers sedert die naweek daar op die strand en in die vlak water beland het. Die pelsers is selfs met werpnette deur hengelaars van die strand ingebring.Die skool pelsers is deur ‘n horde bronshaaie in die vlak water omsingel en op die strand uitgedryf.Die donderweertoestande op see het deur die nag voortgewoed om eers vroeg gisteroggend op Swakopmund af te neem.Op Omaruru het mense wat al 30 jaar op die dorp bly, gesê hulle het nog nooit soveel reën op ‘n slag in November deurleef nie. Die stormweer het met kragonderbrekings op die dorp self en in die onmiddellike omgewing gepaard gegaan. By ‘n herberg wes van Omaruru teen die hange van die Erongoberge moes toeriste met sambrele gehelp word om by hul losstaande rushuise te kom. Veral plekke met grasdakke kon nie al die reënwater uithou nie. Op Omaruru self is gisterogend 70 mm gemeet. In die onmiddellike omgewing het die buie ‘n bietjie afgeneem met neerslae van 20 mm wat steeds voorgekom het. In die rigting van die Erindi-wildpark oos van Omaruru het swaar reën wel geval. Takriviertjies van die Omarururivier was in vloed met water wat die Omarururivier by die gasteplaas Klein Eden bereik het.Oor Swakopmund self het die toestande gisteroggend ietwat opgeklaar met tekens van misweer oor die see.Inwoners op Langstrand het vir Jessica Botes gesê dit het gisteroggend baie hard gereën en dat hulle emmers vol water opgevang het. Gistermiddag het daar steeds water in die strate gelê.Otis Finck het uit Walvisbaai berig groot poele water het inwoners ná deurnagreën begroet.

Meer reën kom oor groter Namibië

Kommentaar

Republikein 2025-07-07

Meld asseblief aan om kommentaar te lewer

Meer reën kom oor groter Namibië

Kommentaar

Republikein 2025-07-07

Meld asseblief aan om kommentaar te lewer

MELD AAN

Advertensie