Meer ontspanne benadering by United

Die netbalklub Trustco United is in 2020 daarop ingestel om 'n nuwe era vir netbalafrigting en -bestuur binne die klub te skep.Die idee is om weg te beweeg van die patroon van tradisionele oefendae op Maandae (fiksheid), Dinsdae en Donderdae (driloefeninge vir individuele en spanvaardighede). In stede hiervan word net een uur per week geoefen, op Woensdae.Die tradisionele oefentye by United word vervang deur die sosiale liga waarmee United aan die einde van 2019 begin het.Dit gee afrigters steeds die geleentheid om individuele aandag aan spelers te gee en hul vaardighede te help verbeter, terwyl spelers se fiksheid weekliks verbeter sonder dat doelbewuste harde werk gedoen word.Die Trustco United Gemengde Sosiale Liga wat verlede jaar van stapel gestuur is, is die eerste van sy soort in Windhoek en tot die organiseerders se verbasing was daar sterk belangstelling met tien spanne wat ingeskryf het.Lede van die netbalbestuur het die afgelope jare opgemerk dat die gemiddelde speler wat voltyds werk én 'n familie het, reeds sukkel om elke week die tyd vir oefeninge in te pas en boonop op naweke 'n ligawedstryd te moet speel.Die sosiale liga het 'n atmosfeer waarin spelers hulle geniet, soos reeds tot dusver ondervind is. Die beginners word gou fiks en aan die einde van die reeks is hul vaardighede véél skerper.Die liga word verdeel in twee afsonderlike toernooie, met spanne wat óf vir Maandae, óf Donderdae, óf vir beide dae kan inskryf. United moedig alle korporatiewe maatskappye in Windhoek aan om hul personeelspanne in te skryf.Die liga is egter nie net tot maatskappyespanne beperk nie. Groepe vriende het ook verlede jaar hul eie spanne ingeskryf met gevatte name soos “Volgende Jaar se Wenners”. Die reëls is eenvoudig. Die standaardreëls van netbal geld op die baan, met vier kwarte van sewe minute speeltyd elk. Spanne verdien twee punte met 'n oorwinning, een punt elk vir 'n gelykopwedstryd, en 'n ekstra punt indien al die spelers in identiese geborgde hemde speel. Elke span mag in elke kwart 'n maksimum van drie manspelers op die baan hê en “rollende plaasvervangers” mag opgestuur of afgehaal word.Vir enige spelers wat wil aansluit, is die eerste oefensessie môre om 18:00 (elke Woensdag).Maatskappye wat spanne vir die gemengde sosiale liga wil inskryf, kan vir Andrea O'Kennedy by sel. 081 424 6890 skakel. Die klub gebruik ook sy Facebook-blad (Trustco United Netball Club) om almal op datum te hou. KHOMASSTREEKDie uitvoerende komitee van Khomas-netbal het aangekondig dat sy algemene jaarvergadering op Saterdag 22 Februarie gehou sal word.Alle lede wat mosies of grondwetlike wysigings wil indien, moet dit minstens 14 dae vooraf by die kantoor van die sekretaris-generaal inhandig. Nuwe klubs wat van voorneme is om by die Khomas-liga aan te sluit, moet ook die jaarvergadering bywoon. Die skedule van wedstryde vir die seisoen sal by die geleentheid goedgekeur word, tesame met die voorsittersverslag en die finansiële verslae.• Die jaarlikse openingstoernooi vir die seisoen in die Khomasstreek sal op 14 Maart by die Khomasdal-stadion aangebied word. Spanne kan in die premierliga, eerste liga of tweede liga ingeskryf word. Die formaat is rondomtalie en nadat elke span dus een keer teen alle opponente gespeel het, sal die span met die meeste punte die wenner wees.Klubs sal dié geleentheid kan gebruik om spelers en kombinasies op die proef te stel met die oog op die Khomas-ligas, wat amptelik op 4 April sal afskop. WANDERERSDie netbalklub FNB Wanderers het reeds met sy oefensessies vir die nuwe seisoen begin. Alle belangstellende spelers word genooi om aan te sluit. Wanderers se hoofafrigter is Ruwanda Janse van Rensburg, met Malie van der Merwe en Ané Otto as hulpafrigters.

Meer ontspanne benadering by United

Kommentaar

Republikein 2025-12-17

Meld asseblief aan om kommentaar te lewer

Meer ontspanne benadering by United

Kommentaar

Republikein 2025-12-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.