Meer as 600 diere baat by mobiele dierekliniek

Tanja Bause - Dit word beraam net sowat 30% van die Namibiese gemeenskap het toegang tot veeartse.Dít, tesame met die groot afstande en die gebrek aan openbare vervoer, dra daartoe by dat baie van die troeteldiere in arm gebiede in hul leeftyd nooit by ’n veearts uitkom nie. Dit lei tot die onbeheerde en ongewenste aanteel van troeteldiere. In Desember 2016 is die Have-a-Heart mobiele dierekliniek begin om die dienste na die mees afgeleë gebiede in Namibië te bring. Dit is die eerste kliniek van sy soort in Namibië. Die kliniek is een week per maand werksaam en sedert die begin het dit 684 honde en katte in 17 plekke ingeënt, gesteriliseer en gekastreer. Die mobiele kliniek het verskeie roetes. Die roete in die Suide sluit Keetmanshoop, Grünau, Karasburg, Lüderitz, Aus en Bethanie in. Op die westerse roete is Outjo, Khorixas en Kamanjab. In die Noorde is Rundu en Katima Mulilo en in die Ooste is Omitara, Witvlei, Otjinene en Gobabis ingesluit. Africa Commercial Vehicles het die Have-a-Heart-organisasie ondersteun met die aankoop en onderhoud van ’n Iveco-voertuig wat in 'n mobiele kliniek omskep is. Die voertuig het ’n ten volle toegeruste operasiesaal, skadunet, kragopwekker en opwasgeriewe. Derhalwe kan die sterilisasie- en kastrasie-veldtogte direk in informele nedersettings en klein dorpe gehou kan word. Mense van veral informele nedersettings hoef nou nie meer ver afstande af te lê om by ’n kliniek of ’n veearts uit te kom nie. Die mobiele kliniek gaan na hulle toe. Have-a-Heart is in 2013 deur me. Lindie Prinsloo op Outjo begin om troeteldiere van lae inkomste-gemeenskappe verniet te steriliseer en kastreer. Sedert die begin van die organisasie het dit uitgebrei en is daar tans Have-a-Heart-lede in 11 dorpe in die land. Gesamentlik het hulle al meer 3 500 diere gesteriliseer. Die lopende uitgawes van die kliniek, asook 60 sterilisasies per maand, word deur die Lafrenz Trust gedek. Have-a-Heart is afhanklik van skenkings van gemeenskappe en die sakesektor. Omdat die trust die lopende uitgawes dek, word alle direkte skenkings gebruik om diere te steriliseer. Die organisasie het ook geld van Animal-Kind International ontvang vir die behandeling van siek of beseerde troeteldiere. Gevolglik kan diere wat met bosluiskoors en wonde na die kliniek geneem word, ook behandel word.

Meer as 600 diere baat by mobiele dierekliniek

Kommentaar

Republikein 2025-06-19

Meld asseblief aan om kommentaar te lewer

Meer as 600 diere baat by mobiele dierekliniek

Kommentaar

Republikein 2025-06-19

Meld asseblief aan om kommentaar te lewer

MELD AAN

Advertensie