Meer as 1 000 stuks kleinvee verkluim, versuip

Tanja Bause - Maandag se reën was nie vir alle Namibiërs goeie nuus nie.Kleinveeboere in die suide van die land het reuseverliese gely omdat die reën in dié omgewing met ysige koue en vloede gepaard gegaan het.Mnr. Alfons Hagen, van die plaas Elim in die Rietoog-omgewing, het nie net sowat 200 stuks kleinvee verloor nie, maar baie van sy infrastruktuur het ook weggespoel. Volgens sy vrou, Valerie, het van die skape en lammers verkluim, terwyl baie weggespoel het omdat die rivier sy walle oorstroom het. “Die werkers het gesien die reën is op pad en het saam met die skape uit die veld terug huis toe gekom. Die rivier het onverwags baie sterk afgekom en hulle is op pad huis toe onkant gevang. Baie van die skape is met die vloedwaters weggespoel en is teen die draadheinings vasgespoel waar hulle versuip het. Dinsdag het ons 144 dooie skape opgetel en die res het weggespoel. Gelukkig kon die werkers teen die koppie ophardloop en hulself na veiligheid bring,” het sy gesê.Die vloedwater het ook baie van die infrastruktuur beskadig of heeltemal weg laat spoel.“My bees- en skaapkrale is weg, my wingerde, hekke, heiningdrade – alles is weg. Die waterpype is uit die grond geruk en het weggespoel. Al wat nog op my erf staan, is die laaibank en ’n stukkie van die agterste heining. Die res is vernietig,” het Valerie gesê. Die krag van die watermassa het hul huis se deur oopgeruk en die huis binnegestroom.“Dit was Maandag. Dinsdag, toe ek die huis se deure wou oopmaak, kon ek nie omdat die ys nog aan die binnekant agter die deur gelê het en dit versper het,” het sy gesê.Haar werkers se huise het ook oorstroom. SpreedshoogteOp mnr. Attie Knipe se plaas, Uibib, wat aan die onderkant van die Spreedshogtepas sowat 40 kilometer van Solitaire af geleë is, het sowat 360 skape gevrek.“Ek het tot Woensdag al 340 weggegooi. Ek probeer nou van dié wat nog lewe, te voer en aan die lewe te hou. Hier lê nog baie van hulle rond. Ek probeer om hulle deur te kry. Ander skape is nog soek,” het hy gesê. Volgens Knipe sukkel hy al sedert 2016 met sebras wat vanuit die Namib Naukluft Park hul intrek op sy plaas geneem het. “Ek het genoeg reën gekry. Ek het 160 mm gekry en vir ons omgewing is dit meer as genoeg. Maar die sebras vreet al my weiding op. Ek het niks gras op my plaas vir my skape nie, dus is my skape baie skraal. Met die reën en die oostewind wat ons Maandagnag ervaar het, het hulle eenvoudig verkluim.”RehobothMnr. Piet Coetzee van die plaas Aukakam in die Rehoboth-omgewing het altesaam 132 stuks kleinvee verloor.“Sowat 24 mm ligte reën het geval. Die wolk het toe gedraai en dit het baie sterk begin reën. Altesaam het ons 77 mm gekry met ’n ysig koue wind. Die werkers het my gebel en gesê daar is groot moeilikheid op die plaas. Ek het onmiddellik plaas toe gery en 82 bokke en skape dood aangetref. Altesaam 50 stuks kleinvee was halfdood, maar hulle is met die koue wat ons Dinsdag nag gekry het, ook dood,” het hy gesê.“Ek het Dinsdag in my voertuig geklim en terug Windhoek toe gery. Ek kon en wou dit net nie meer sien nie. Dit is hartverskeurend.”Volgens Coetzee het hulle nog nooit in Oktober op die plaas reën ontvang nie. In November het dit al liggies gereën, maar dit is nie die norm nie.“Dit was heeltemal onverwags. Ons is onkant betrap. As ons ’n waarskuwing gehad het, kon ons die skape in die skuur gesit het, maar daar was geen waarskuwing nie. Toe dit so sterk reën en koud begin word, het die werkers ook in hulle huise skuiling gesoek. Daar was niks wat iemand kon doen nie,” het hy gesê. “Ons is baie dankbaar vir die reën, maar baie hartseer oor die skade en die genetika wat daarmee heen is,” het Coetzee gesê.Die drie Olivier-broers van die plaas Blomputs, 33 km oos van Rehoboth, het gesamentlik 75 stuks kleinvee verloor.“Ons het maar net 30 mm reën gekry, maar ’n verskriklike koue wind het gewaai en hulle het eenvoudig gevrek,” het mnr. Karl Olivier gesê. GibeonMnr. Benno Kuberski van die plaas Diamantkop in die Gibeon-omgewing het meer as 100 skape verloor nadat sy plaas 68 mm reën gekry het. “Die reën het Maandagnag dwarsdeur die nag geval met ’n ysige koue wind. Dinsdagoggend het ons oor die 100 lammers, ramme en ooie dood gevind met talle wat nog besig was om te vrek. Dit is chaos,” het hy gesê.“Ons moet dankie sê vir die reën en ons moet die skade wat ons gekry het maar net soos ’n man vat.”Mnr. Dirk Mouton het sowat 165 stuks kleinvee verloor, en mnr. Dirk van Wyk meer as 300 stuks op die plaas Ebenhout. Ander boere in die Rietoog-omgewing het saam meer as 100 stuks vee verloor. Lees ook die berig op bladsy 3.

Meer as 1 000 stuks kleinvee verkluim, versuip

Kommentaar

Republikein 2026-08-04

Meld asseblief aan om kommentaar te lewer

Meer as 1 000 stuks kleinvee verkluim, versuip

Kommentaar

Republikein 2026-08-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.