Mediese sorg bring vreugde in afgeleë gebied

Die Hochland Tafelronde 154 se Medic RUSH (“Rural Upliftment and Social Healthcare”)-span het onlangs die Laerskool Dawid //Khamuxab op die Seringkop-nedersetting sowat 60 km van Outjo hul basis gemaak om deur middel van 'n mobiele kliniek mediese sorg aan die gemeenskap te bied.Die span van 50, bestaande uit dokters, verpleegsters, vrywilligers en lede van die Hochland Tafelronde het vir vier dae daar gaan help om gratis basiese gesondheidsorg aan die arm plaasgemeenskap te verleen. Standard Bank het sowat N$100 000 vir dié doel geskenk. Twee van die bewoners van die gebied wat beslis by die uitreik gebaat het, is Anna Swarts (76) en Margaret Kheises (65). “Ons het van Otjiwarongo af Seringkop toe getrek toe die regering grond hier gekoop en aan ons toegeken het om op te boer,” sê Kheises, wat al agt jaar daar woon. Swarts het drie jaar gelede soontoe getrek. Hoewel hulle die vrede van die omgewing geniet, sukkel hulle maar steeds om vir hul gesinne 'n beter toekoms te verseker en is mediese sorg skaars bekombaar, met die naaste kliniek op Outjo. 'n Verpleegster wat ook daar woon, help soms, maar sukkel self om die pot aan die kook te hou.Die vroue was dus baie dankbaar om gratis medikasie sowel as 'n warm winterkombers by die Medic RUSH-groep te kry. “Hulle het ver gekom om te wys dat hulle vir ons omgee,” het Swarts gesê. Sandrina Mangundu (23), 'n ma van twee en afkomstig van Rundu, het ook soontoe getrek toe haar man werk daar naby gekry het. Sy was net so dankbaar vir die mediese hulp, aangesien dit hulle sowat N$500 vir 'n rit Outjo toe kos en hulle dit slegs in noodgevalle kan bekostig. “Ek wens ons kon elke maand so 'n kliniek hier hê.”Die jong dokters het die ervaring ook as waardevol ervaar. “Namibië ondervind steeds baie uitdagings wat gesondheidsorg betref, en hierdie ervaring het my perspektief op die diens in die land heelwat verbreed,” het dr. Rachel Haludilu en haar kollega Soraya Podewiltz gesê.

Mediese sorg bring vreugde in afgeleë gebied

Kommentaar

Republikein 2025-09-19

Meld asseblief aan om kommentaar te lewer

Mediese sorg bring vreugde in afgeleë gebied

Kommentaar

Republikein 2025-09-19

Meld asseblief aan om kommentaar te lewer

MELD AAN

Advertensie