Mboma, wêreldrekordhouer, bly beskeie

Tielman van Lill – Die tweede oudste rekord in wêreldatletiek staan reeds vir 35 jaar – bykans dubbeld hul leeftyd. Wie wil wed dat een van Namibië se twee tienerjarige supersterre dit dalk eendag kan uitvee?Beatrice Masilingi (18) en Christine Mboma (17) het gister saam met hul afrigter, mnr. Henk Botha, by Republikein se geselsprogram Kletskompas kom kuier, 'n dag ná hul aankoms van 'n briljante deelname in Lusaka, Zambië.Die beskeie Mboma, nou erken as die 400 meter se nuwe junior (o.18) wêreldrekordhouer met 49.24 sekondes ná haar vertoning Sondag by die All Comers-byeenkoms, sê sy was boonop stadig uit die blokke.“Ek het 'n swak wegspring gehad en moes op die ander atlete inhaal. “Daar was wel 'n elektroniese horlosie langs die baan, maar ek het nie my tyd raakgesien nie, want ek het op die wedloop gekonsentreer. “Iemand het my geroep en my gewys wat my tyd was. Ek was geskok en kon dit nie glo nie, maar terselfdertyd baie bly oor my prestasie. Ek dink as ek 'n beter wegspring gehad het, kon ek onder die 49 sekondes gedraai het.”Net nog 1.64 sekondes staan tussen Mboma en die deurwinterde 35-jaaroue senior 400-wêreldrekord van 47.60 wat deur Marita Koch gehou word. Koch, een van die eertydse Oos-Duitsland se omstrede vroueatlete voordat toetsing vir verbode middels behoorlik ontwikkel was, het die rekord op 6 Oktober 1985 in Canberra, Australië, as 28-jarige behaal.Beide Masilingi en Mboma het reeds in die 400 vir die Tokio Olimpiese Spele in Japan gekwalifiseer wat van 23 Julie tot 8 Augustus plaasvind. Masilingi het ook laas naweek in Lusaka met haar 200-tyd van 22.72 sekondes haar deelname in dié item by die Spele verseker.Die onder 20-wêreldkampioenskap in Augustusmaand in Nairobi sal die twee wêreldklas atlete se volgende stop ná die Spele wees. Buiten vir die 400 sal Mboma in Kenia ook aan die 800 m deelneem. Sy het laas naweek opnuut vir die 800 gekwalifiseer en haar 2:03.27 plaas haar prestasie tweede vir dié kalenderjaar ná Claudia Hollingworth van Australië met 2:01.60. By die senior 800-vroue is sy 54ste deur Wêreldatletiek gelys.Masilingi en Mboma is tans die wêreld se nommer een en twee in die 400 op junior sowel as senior vlak, terwyl Masilingi 12de in die 200 by die senior vroue gereken word met 22.72. Tussen die wêreld se juniors in die 200 is Masilingi derde geplaas, met net Tamari Davis van die VSA (22.64) en Favour Ofili van Nigerië (22.69) voor haar.Botha sê: “Beatrice se tyd in Lusaka was besonders, want die wind was sterk van voor in die pylvak. Ek dink dit is besonderse prestasies wat die meisies behaal het.“As jy ernstig is om 'n topklas atleet te word, sal jy opofferings in die lewe moet maak. Die meisies moes baie opgee om by my te kom bly. Christine se familie is in Divundu, terwyl Beatrice s'n in Rundu is.“Hulle werk ongelooflik hard om sukses te behaal. Ek dink baie mense besef nie wat dit verg vir 'n atleet om die boonste sport te bereik nie. Dit kos toewyding, dissipline en volharding. “Soms reën dit en ander dae skyn die son ongelooflik warm. Boonop sukkel ons sonder 'n behoorlike baan om op te oefen. Hulle slyp tans op 'n rugbyveld, maar ons maak die beste daarvan. “Ek het wel vir die ministerie gevra vir hulp, want met Covid kan ons nie in Umulunga gaan oefen nie. Maar daar is 'n doel met alles en ons weet waarvoor ons werk.“Ek glo 'n atleet moet aan hul land se nasionale kampioenskap deelneem en dit sal komende Saterdag en Sondag (in Windhoek) wees. “Daarna sal ons nie weer vir byeenkomste inskryf nie. Voor die Spele is die plan om hulle in Europa by een Diamantligabyeenkoms te laat hardloop ter voorbereiding vir Tokio.“Iets wat my naby aan die hart lê, is die ondersteuning van ons atlete. Kom asseblief en moedig ons atlete aan. Toegang is gratis. Maak nie saak of dit Beatrice of Christine is nie, die atlete het hul mense nodig.”Masilingi vertel: “Ek het regtig van onder af met niks begin nie. Harde werk en toewyding saam met coach Henk en Christine het my gebring waar ek vandag is. Ek moet vir Christine bedank.“Op skooldae is ons die eerste drie periodes in die gimnasium en dan draf ons klas tot 16:00. Sesuur is ons op die oefenveld vir tegniek of ander fasette.“Ons het nie 'n tienerlewe soos ander kinders nie. Ons dagprogram is straf, maar dit is alles die moeite werd.”Mboma sê sukses kom nie oornag nie. “Jong mense moet onthou sukses kom deur opoffering, toewyding, volharding en dit neem tyd. Ons het nie eintlik vriende nie, want ons lewe net op die oefenveld en by die skool. Maar ek is nie bekommerd nie, ek weet vriende sal mettertyd deel word van my lewe as ek eers 'n sekere vlak bereik.– tielman@republikein.com.naFOTOTerug uit Lusaka ... Beatrice Masilingi (links) met haar twee silwermedaljes (400 en 200), mnr. Henk Botha (afrigter) en Christine Mboma met haar twee goues vir die 400 en 800 meter.

Mboma, wêreldrekordhouer, bly beskeie

Kommentaar

Republikein 2025-11-05

Meld asseblief aan om kommentaar te lewer

Mboma, wêreldrekordhouer, bly beskeie

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.