Mboma maak Olimpiese geskiedenis

Sportredaksie – Die volle omvang van Christine Mboma se prestasie om die Olimpiese silwermedaljewenner in haar “tweedebeste” atletieknaelloop te verower, kan beswaarlik oorbeklemtoon word.Die 18-jarige het die atletiekwêreld aan haar voete met die skouspelagtige wyse waarop sy gister 'n sterbelaaide Olimpiese 200-meterfinaal onder stof gehardloop het.In vroeër gesprekke met die Namibiese media het haar afrigter Henk Botha vir Mboma die vinnigste vroulike hardloper ter wêreld begin noem en op grond van haar vertonings van vaartversnelling by die Tokio 2020 Olimpiese Spele is daar al hoe minder mense wat van hom sal verskil.Net Jamaika se nuwe “dubbel-dubbele” Olimpiese kampioen Elaine Thompson-Herath kon haar kenmerkende inhaalpoging in die pylvak weerstaan. Thompson spog nou met die goue medaljes vir die 100 en 200 meters van die Rio 2016 asook die 2020 Tokio Speles.Vir die tweede keer in twee dae het Mboma die nuwe o.20-wêreldrekord asook die Afrika senior en o.20-rekords tot 21.81 sekondes verbeter, wat ná die vorige aand se semifinaal op 21.97 gestaan het. Dié is nou ook die Namibiese nasionale rekord.Beatrice Masilingi (18) het ook die wedloop van haar lewe gelewer om sesde in 22.28 te eindig, met haar nuwe persoonlike beste tyd van 22.40.Mboma en Masilingi is enkele weke voor die Spele deur Wêreldatletiek aan hul beste item, die 400 meter, onttrek op grond van hul natuurlike hoë testosteroonvlakke.Mboma se puik sege is een vir alle Afrika-atlete, vroue en tieners met drome. Met haar verbysterende vertoning het sy op haar stil manier maar net weer Wêreldatletiek se neus behoorlik in die grond gevryf.Thompson-Herah (29) moes gister met haar vinnigste tyd ooit vorendag kom (21.53) vir die Olimpiese goud en 'n nuwe nasionale Jamaikaanse rekord. In beide die 100 en 200 is wyle Florence Griffith-Joiner die enigste vrou in die geskiedenis wat vinniger tye kon opstel.Gabrielle Thomas (24) van die VSA was derde in 21.87 vir brons, met die Jamaikaanse ster Shelly-Anne Fraser Pryce (34) vierde in 21.94 sekondes. Vyfde was Marie-Josée Ta Lou (32) van die Ivoorkus (22.27), sesde Masilingi en sewende Mujinga Kambundji (29) van Switserland (22.30) met Shaunae Miller-Uibo (27) van die Bahamas in 24.00 sekondes wat nie die pas kon volhou nie – grootliks omdat die 400 meter se uitdunne ook gister begin het waarin sy nou die volslae gunsteling vir die goud is.Op haar beskeie manier het Mboma gister in haar media-onderhoude gewaarsku dat haar beurt nog ver van uitgespeel is.“Hierdie was my eerste Olimpiese Spele,” het sy gesê – met Namibië uiteraard in ewe gretige afwagting op die 2022 Statebondspele en die 2024 Olimpiese Spele in Parys.“Ek het hierheen gekom vir die ondervinding, maar ek het beter gevaar as wat ek verwag het. Ek is baie bly oor my vertoning. Ek is trots op myself.“In die verlede was ek elke keer senuweeagtig wanneer ek teen die beste hardlopers ter wêreld aangetree het. Maar nou voel ek nie meer so nie. Sodra ek begin hardloop het, was die senuwees vergete en het ek net hard gedruk. Ek gee nooit op nie. Ek het net op die 200 gefokus. Nou het ek 'n medalje. Ek is gelukkig.”Foto’s Getty Images/Nampa/AFP/Reuters

Mboma maak Olimpiese geskiedenis

Kommentaar

Republikein 2025-12-16

Meld asseblief aan om kommentaar te lewer

Mboma maak Olimpiese geskiedenis

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.