Mboma en Masilingi terug in kollig by Grand Prix

Tielman van Lill – Atletiek Namibië bied môre sy tweede Grand Prix-reeksbyeenkoms (uit tien vir die jaar) by die Onafhanklikheidstadion in Olympia aan. Wat die items betref, verskil môre se kompetisie aansienlik van verlede naweek se Grand Prix in Swakopmund. Die 100 meter vir mans en vroue maak plek vir die 200 vir beide geslagte. Dus sal Christine Mboma (11.25 sekondes) en Beatrice Masilingi (11.37) nie môre al kan uitvind of huolle dalk hul tye van die eerste Grand Prix kan verbeter nie.Die 400 m vir mans en vroue maak plek vir die 400-hekkies, terwyl vroue die 5 000 m sal aandurf. Die gewilde 800 meter (mans en vroue) kan ook groot byval vind, wat nie in Swakopmund op die program was nie. Volgens mnr. Henk Botha, afrigter van Mboma en Masilingi, sal sy twee uitblinkeratlete vir die 200 aantree. Weens 'n strawwe voorseisoense oefenprogram is beide atlete tans nog besig om op te bou na hul beste peil, het hy opnuut benadruk.Indien hul vertoning verlede naweek egter 'n aanduiding is van wat môre wag, sal hulle opnuut die tartan aan die brand hardloop.Hoewel atletiek in Namibië nie net deur Mboma en Masilingi verteenwoordig word nie, is daar min (indien enige) ander kandidate op die kortlys vir vanjaar se twee groot byeenkomste in Statebondspele (Birmingham in Julie/Augustus) en die wêreldkampioenskap (Eugene, Oregon, VSA, 15 tot 24 Julie).Die marathon-veteraan Helalia Johannes (41) kan moontlik die enigste ander kwalifiseerder wees. Sy het verlede jaar Augustus by die Olimpiese Spele in Tokio elfde in 'n heel skaflike 2 uur 31 minute 22 sekondes geëindig. In Desember 2020 het sy in Spanje met 2:19:52 'n Namibiese nasionale rekord opgestel. Dié veteraan was ook reeds vier keer by die wêreldkampioenskap in aksie waar sy onderskeidelik in 2:50:19 (55ste, Duitsland), nie klaargemaak nie (2013, Rusland), 2:32:01 (19de, Engeland) en 2:34:15 (bronsmedalje in Doha, Katar) behaal het.Sy is 'n viermalige Olimpiër. In 2008 was haar eerste Olimpiese marathon-verskyning in Beijing (2:35:22, 40ste), 2012 Londen (2:26:09, 11de), 2016 Rio de Janeiro (2:39:55, 56ste) en 2021 Tokio (2:31:22, 11de).Johannes se grootste oomblik was sekerlik in Australië by die 2018 Statebondspele toe sy die goue medalje in 2:32:40 verower het. Die kwalifiserende standaard vir Eugene in die vrouemarathon is 2:29:30 en vir Birmingham 2:38:19. Johannes het reeds haar kwalifisering vir beide verseker toe sy Novembermaand die New York-marathon in 2:26:09 afgelê het.Mboma en Masilingi het beide reeds verlede jaar vir die Statebondspele en die wêreldkampioenskap in die 200 gekwalifiseer, met hul vertonings in die Olimpiese finaal.Vroue in die 100 meter moet 11.15 vir deelname aan die wêreldkampioenskap aanteken, terwyl die Statebondspele se kwalifiserende vereiste met 11.20 'n rapsie ligter weeg.Die jeugdige Ryan Williams sal nog heelwat op sy beste vertoning in die diskusgooi (53.92 m, Namibiese senior rekord) moet verbeter om vir Eugene (66.00 m) of vir Birmingham (59.92 m) te kwalifiseer.Atlete het tot 29 Mei om kwalifiserende vertonings vir Eugene te lewer.PROGRAM VIR MÔRE09:00 5 000 meter vroue. 09:30 gewigstoot vroue; verspring vroue; diskusgooi mans; hoogspring mans; 400 m hekkies vroue. 09:45 400 m hekkies mans. 10:00 driesprong mans; spiesgooi mans. 10:30 diskusgooi vroue; 800 m vroue. 10:45 800 m mans. 11:00 200 m vroue. 11:15 200 m mans. 12:00 4x400 aflos vroue. 12:15 4x400 aflos mans.FOTOBeatrice Masilingi (links) en Christine Mboma druk mekaar in die 100 meter laasnaweek in Swakopmund.Helalia Johannes met haar goue medalje wat sy by die 2018 Statebondspele in Australië opgeraap het. Foto's Tielman van Lill

Mboma en Masilingi terug in kollig by Grand Prix

Kommentaar

Republikein 2026-03-23

Meld asseblief aan om kommentaar te lewer

Mboma en Masilingi terug in kollig by Grand Prix

Kommentaar

Republikein 2026-03-23

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.