Matheus voorsitter van Sportkommissie

Andrew Poolman

Minister Jerry Ekandjo van sport, jeug en nasionale diens het gister die nege nuwe kommissarisse van die Namibiese Nasionale Sportkommissie ingesweer.
Die president van die Namibiese Vlugbalfederasie, mnr. Joel Matheus, sal as die nuwe voorsitter van die Sportkommissie diens doen.
Mattheus word die afgelope jare as ’n sportadministrateur hoog aangeslaan. Hy is by die Namibiese weermag as ’n sportadministrateur werksaam en dien onder meer op die Afrika kontinentale afrigterskommissie vir vlugbal.
“Ek het hierdie verantwoordelikheid nie in dié stadium verwag nie, maar ek waardeer die vertroue wat die minister in my gestel het om te sorg dat sportsake in die land vlot verloop. As ’n span sal ons streef na die verbetering van die algemene ontwikkeling van sport in die land,” het Matheus agterna gesê.
Die ander agt kommissarisse wat vir die volgende driejaartermyn diens sal doen, is
• Rudolph Haingura (Tisan, Tersiêre Instellings Sportvereniging van Namibië);
• Benjamin Rebang (president van die Namibiese Boksfederasie);
• Peter Wilson (sport vir gestremdes in Namibië);
• Me. Adelheid Jacobs (Nawisa, Namibiese Vereniging vir Vroue in Sport), ’n vrouesokkerspeler wat op Keetmanshoop by die ministerie van arbeid werk;
• Me. Monica Shapwa (Namibiese Sokkervereniging) werk by die Namibiese Diamanthandelsmaatskappy. Sy is spanbestuurder van die sokkerklub Tura Magic en was onder meer op die plaaslike organiserende komitees vir die Cosafa-toernooi en die 2014 Afrikabeker vir vroue;
• Adv. Jesse Schickerling (Namibiese Nasionale Olimpiese Komitee) was tevore vir nege jaar president van die nasionale hokkie-unie en het sowat 30 jaar ondervinding in sportontwikkeling en -afrigting;
•Thomas Mbeeli (Namibië Rugby-unie en Jaguars Rugbyklub) was onder meer tevore ’n spanbestuurder van nasionale spanne en sedert 2012 ’n uitvoerende lid van die NRU;
• Erica Beukes (Namibiese Skolesportunie), ’n onderwyseres van Otavi en die enigste wat nie gister self teenwoordig was nie.
“Julle is almal deur spesifieke sportkodes of sambreelliggame genomineer, maar ek wil julle herinner om Namibiese sport in sy groter prentjie te dien en nie net die groep wat julle benoem het nie,” het Ekandjo gemaan.
Die minister het in elke posisie die finale keuse gedoen uit benoemings wat deur die betrokke nasionale beheerliggame gedoen is.
Minister Ekandjo het die nuut verkose lede aanbeveel om so gou moontlik ’n beraad te hou om hulself ten volle op die hoogte te bring van die Namibiese Sportwet waarvan hulle die toesighouers sal wees. ’n Ondervoorsitter moet ook by dié beraad deur die lede verkies word.
Die vorige sportkommissarisse se termyn het op 31 Mei verstryk.
Die adjunkminister van sport, me. Agnes Tjongarero, het ook die nuut verkose kommissarisse aangemoedig om die nodige ywer aan die dag te lê.
“Ek wil geen sportfederasies met klagtes in die gange van die ministerie sien nie. Dit sal ’n teken wees dat julle nie die werk doen waarvoor julle gekies is nie.
“Hierdie taak is nie ’n pretrit nie. Sport gaan daaroor om betyds te wees en as dit te veel gevra is, kan julle laat weet sodat ons julle kan vervang,” het sy gesê.