Master KG wen MTV EMA-prys

Die Suid-Afrikaanse platejoggie Master KG beleef ondanks die Covid-19-pandemie ’n droomjaar.Benewens die wegholsukses van “Jerusalema”, sy liedjie met die sangeres Nomcebo Zikode wat reeds meer as 227 miljoen keer op YouTube gekyk is, is hy Sondag met ’n internasionale musiekprys bekroon.Kort na sy optrede by die Namibië Toerisme Ekspo (NTE) op Donderdag, 5 November, is Master KG by die MTV Europese Musiekpryse (EMA) aangewys as die beste musikant uit Afrika. Hy is die eerste Suid-Afrikaner sedert Freshlyground in 2006 en Locnville in 2013 wat dié prys kon wen.Hy het die prys voor die musikante Burna Boy (Nigerië), Gaz Mawete (Demokratiese Republiek van die Kongo), Kabza de Small (Suid-Afrika), Rema (Nigerië), “Scorpion Kings” Maphorisa (Suid-Afrika) en Sheebah (Uganda) weggeraap, wat saam met hom in die kategorie benoem was.“Hallo, almal daarbuite. Dit is Master KG,” het hy in ’n bedankingstoespraak gesê, wat vooraf opgeneem en uitgesaai is.“Ek wil graag elke mens wêreldwyd bedank wat dít (die prys) moontlik gemaak het. Ek het pas die MTV EMA vir beste musikant uit Afrika gewen!“Ek wil graag my suster Nomcebo, my span by Open Mic Productions, en almal wat Master KG ondersteun, bedank – baie dankie. Aan al my aanhangers wêreldwyd, sonder julle sou dit nie moontlik kon wees nie.”Die departement van sport, kuns en kultuur het Sondagaand kort voor middernag ’n verklaring uitgereik om Master KG geluk te wens. Netwerk24 het vroeër berig dat Master KG én Zikode deur die departement aangestel is as Suid-Afrika se amptelike ambassadeurs vir kuns en kultuur.“Ons is ongelooflik trots op ons ambassadeurs, Master KG en Nomcebo Zikode, wat een van die grootste liedjies ter wêreld geskep het,” het Nathi Mthethwa, minister in die departement, in die verklaring gesê.“Dit (die prys) is nie net ’n oorwinning vir Suid-Afrika nie – dit is ’n oorwinning vir die hele Afrika. Jul patriotisme sal in geskiedenisboeke opgeteken word soos julle voortgaan om die reënboognasie op die wêreldkaart te plaas.” - Netwerk24

Master KG wen MTV EMA-prys

Kommentaar

Republikein 2025-07-03

Meld asseblief aan om kommentaar te lewer

Master KG wen MTV EMA-prys

Kommentaar

Republikein 2025-07-03

Meld asseblief aan om kommentaar te lewer

MELD AAN

Advertensie