Massiewe werktuig tref motors op Walvis

Des Erasmus en Otis Finck - ’n Vrou het wonderbaarlik aan die dood ontkom en skade van miljoene dollars is veroorsaak toe ’n swaar, mobiele hyskraan gistermiddag in die etensuur in die parkeerterrein voor die Walvisbaaise munisipaliteit omgeslaan het.
Drie motors is deur die nekstuk van die kraan getref en platgedruk.
Die ongeluk het ook ’n watertoevoerpypleiding na die stadhuis beskadig. Duisende liter water het uitgelek met spuitfonteintjies wat tussen sluit­stene van die geplaveide terrein ontstaan het. Net die bergingswerk op die toneel voor die munisipale gebou gaan nog dae duur. ’n Tweede hyskraan sal waarskynlik nodig wees om die gevalle eerste kraan weer op sy wiele te kry.
In twee van die drie motors wat deur die vallende staalmonster getref is, was nie mense nie. Daar word aanvaar dat hulle met sake in die munisipale kantore besig was. In die derde motor was net ’n vrou agter die stuurwiel. Sy het net skok opgedoen met omstanders wat beweer het dit is ’n bestiering dat sy nog leef. Sy is wel op die toneel vir skok behandel en daarna vir waarneming na ’n hospitaal gebring. Onmiddellik ná die ongeluk het ’n horde mense op die toneel saamgedrom.
Die operateur van die hyskraan het ook ongedeerd daarvan afgekom.
Die hyskraan behoort aan Walvis Bay Plant & Tool Hire, ’n maatskappy met ’n haas vlekkelose veiligheidsrekord.
Die kraan beskik oor ’n hysmassa van 200 ton. Dit was op die toneel met die laaste afrondingswerk besig met die afslaan van ’n groot markiestent op die grasperk voor die munisipale gebou. Die tent was Vrydag vir die Heldedagvieringe op Walvisbaai gebruik.
Die ses segmente van die nek van die hyskraan maak dit geskik om swaar vrag oor ’n relatiewe lang afstand op te hys en te swaai.
Op die toneel het ’n amptenaar beweer die ondergrondse waterpyp het as ’n waterpunt vir die brandweerdiens gedien, sou ’n groot vuur in die omgewing uitbreek. ’n Moontlikheid bestaan nie van ’n menslike fout wat aanleiding tot die ongeluk kon gegee het nie. Die hyskraan beskik oor amfibiese voetstukke wat dit veranker wanneer swaar vragte opgehys moet word. Die voetstukke staan weer op ’n groter mat wat dit stewig laat vastrap. Daar word vermoed dat van die plaveisel onder een van die voetstukke onder die geweldige druk meegegee het wat veroorsaak het dat die hyskraan gekantel en geval het.
Ná die voorval was daar aanduidinge dat van die segmente in die reikarm van die hyskraan met die valslag geknak het. Toe die ongeluk gebeur het, was die hyskraan blykbaar besig om die laaste raamwerk van die tent te swaai, met net ’n paar werkers op die toneel.