Masilingi en Mboma kwalifiseer beide vir IAAF-skouspel in Kenia

Andrew Poolman - Grootfontein se indrukwekkende naellopers Beatrice Masilingi en Christine Mboma het van die beste prestasies behaal toe Atletiek Namibië en Coca-Cola se Grand Prix-reeks vir klubs die naweek van stapel gestuur is.Masilingi en Mboma is beide skoolmeisies van Agri Kollege en die aanbieding van die byeenkoms in hul agterplaas by Rietfontein het dus so reg in hul kraal geval.Masilingi was onstuitbaar met oorwinnings in die 100, 200 en 400 meter, met goeie wentye van onderskeidelik 12.09 sekondes (haar uitduntyd was nog vinniger, 11.7), 24.05 en 54.10. Sy het dus haar kwalifikasie vir die IAAF junior wêreldkampioenskap in Nairobi (7 tot 12 Julie) in elkeen van die drie naellope verseker.Die item waarin Mboma eintlik spesialiseer, die 800, is nie aangebied nie en gevolglik het sy haar skool- en klubmaat van QSB Windhoek Hochland in die 400 voluit uitgedaag. Die uiteinde is dat beide toe in dié naelloop die kwalifiserende tyd vir Nairobi oortref het (54.85).Mboma se tweede plek was in 54.80 sekondes en hoewel Masilingi tot heelwat vinniger in staat is, moet onthou word dat sy toe reeds wenpogings in die 100 én 200 gelewer het.“Ek het vooraf vir Beatrice gesê dat sy dit in die 400 maar rustig kan vat, maar toe Christine haar begin druk, het sy ook gereageer en versnel. Beatrice se mikpunt is om vanjaar haar beste tyd om die baan tot minder as 52 sekondes te snoei,” sê mnr. Henk Botha, organiseerder en afrigter van beide die meisies.Mboma se tweede goud vir die dag was in die 1500 meter, in 5:00,33.Mahmad Bock het in die 400 meter 'n uitstekende tyd van minder as 45 sekondes aangeteken – hoewel die Unam-hardloper agterna gediskwalifiseer is nadat hy glo vanaf 'n verkeerde plek weggespring het. Amptelik is die eerste plek dus aan Eugene van Kradenburg (Rehoboth, 49.74) toegeken.Bock het die 200 meter ook gemaklik gewen in 21.36 sekondes, om vir Sandro Diergaardt (21.45) en Ernst Narib (21.58) sy hakskene te wys.Die mans 100-titel is deur Jesse Uri-khob (Nampol) losgehardloop, wat die afstand in 10.68 sekondes afgeblits het om voor Ernst Narib (Nampol, 10.71) en Valencio Cloete (Unam, 11.03) te bly.Uitstaande prestasies in die velditems was dunner gesaai. Hitjivirue Kaanjuka, tevore 'n 100- en 200-atleet op wêreldvlak, het in die Nampol-kleure die gewigstoot met 11.23 meter gewen. Organiseerders wys daarop dat hoewel die seisoen reeds in die laaste maande van verlede jaar begin het, die Namibiërs meestal eers van Januarie af hul beste peil begin bereik. “Atletiek Namibië kan 'n klop op die skouer kry vir 'n goeie byeenkoms by die nuwe Rietfontein-baan. “Die direktoraat van jeug asook die organiseerders Henk Botha en Bethold Karumendu het die baan mooi skoon gemaak en het meegewerk om alles mooi te laat vlot.“Die terugvoer van die atlete was dat hulle dit baie geniet het om op die baan te hardloop,” sê me. Leoni van Rensburg.• Die tweede byeenkoms in AN en Coca-Cola se Grand Prix-reeks is bestem vir 22 Februarie op Otjiwarongo. Swakopmund sal op 7 Maart aan die beurt kom en Windhoek op 28 Maart.GELDENHUYS WEN IN GAUTENGNog 'n skoolseun, Ivan-Danny Geldenhuys, was die derde Namibiër wat die kwalifiserende peil vir die IAAF junior wêreldkampioenskap behaal het.Geldenhuys het Saterdag in Johannesburg aan 'n 400 meter-wedloop deelgeneem (die Pumas School of Speed-byeenkoms) en het die eerste posisie in 47.64 sekondes ingeneem.“Ivan is vanjaar onder 19, terwyl Beatrice en Christine nog maar o.17 is en dus nog beter kan vaar wanneer hulle ook op gelyke voet in daardie ouderdomsgroep meeding,” sê Van Rensburg.

Masilingi en Mboma kwalifiseer beide vir IAAF-skouspel in Kenia

Kommentaar

Republikein 2025-06-19

Meld asseblief aan om kommentaar te lewer

Masilingi en Mboma kwalifiseer beide vir IAAF-skouspel in Kenia

Kommentaar

Republikein 2025-06-19

Meld asseblief aan om kommentaar te lewer

MELD AAN

Advertensie