Mars-helikopter oortref stoutste verwagtinge

Elvira HattinghDie Ingenuity Mars-helikopter het onlangs sy 17de vlug afgelê en terselfdertyd die mylpaal van 30 vliegminute in die lug behaal – iets wat die span van Nasa se Straalaandrywingslaboratorium (JPL) nooit gedink het haalbaar sou wees nie. Sedertdien het die helikopter verlede week ook sy 18de vlug afgelê, het die JPL in ’n mediaverklaring gesê. Dit het nou altesaam sowat 3,6 km op die rooi planeet afgelê, teen ’n hoogte van 12 meter en ’n pas van 5 meter per sekonde. “Min mense het gedink ons sal die eerste vlug haal, wat nog te sê van vlug nommer vyf. Niemand het gedink ons sal so ver kom nie,” het die Ingenuity-spanleier Teddy Tzanetos gesê. “Op sy roete om net meer as ’n halfuur in die lug te bestee, het hy agt maande se ysige koue oorleef en is hy uit nege eiesoortige Mars-vliegvelde bestuur. “Die tuig se voortgesette werksaamhede dui op die robuustheid van sy ontwerp, asook die ywer en passie van ons klein spannetjie,” het Tzanetos gesê. Hierdie sou onbetwyfeld ’n trotse oomblik vir wyle dr. Japie van Zyl gewees het, wat voor sy dood ten nouste betrokke was by Nasa se Perseverance-verkenningstuig wat vroeg vanjaar op Mars geland het en boonop die klein helikoptertjie saamgeneem het. Ingenuity het op Mars aangekom terwyl dit aan die Perseverence-tuig se maag vasgemaak is. Die helikopter was die breinkind van dr. Van Zyl, voormalige direkteur van sonnestelselverkenning by Nasa se JPL-laboratorium.UITSTEKENDE TOESTANDDie JPL sê hulle kon nie dadelik ná 5 Desember vasstel of die vlug ’n sukses was nie omdat die in-vlug datastroom onverwags uitgesny het toe dit gaan land het. Op 10 Desember is egter inligting ontvang wat aangedui dat die vlug was nie net ’n sukses nie, maar dat Ingenuity steeds in ’n uitstekende toestand verkeer.Met die bereiking van dié mylpaal is die aanvanklike planne met die 1,8 kg helikoptertjie oortref. Dit was ontwerp om net sowat vyf eksperimentele toetsvlugte af te lê. Dit het die eerste keer op 19 April vanjaar gevlieg, met ’n vinnige op-en-af “wip” om te wys dat beheerde vlugte op Mars moontlik is. Tydens die daaropvolgende vier toetsvlugte het Ingenuity al hoe langer begin vlieg en al meer komplekse maneuvers uitgehaal.Tydens sy sesde vlug, sê die JPL, het dit met ’n demostrasiefase begin, waartydens dit ondersoek het hoe lugverkenning en sy ander funksies kan bydra tot die toekomstige verkenning van Mars en ook ander wêrelde. Van Zyl het in 2018 tydens ’n onderhoud met Republikein verduidelik dié projek lê hom baie na aan die hart en dat hy in 2013 omtrent vir sy Mars-helikopter moes “baklei”.Danksy Van Zyl sal dit dus die heel eerste keer in die geskiedenis wees dat ’n klein, outomatiese helikopter op ’n ruimtesending vir verkenning ingespan word. Dit sal drie keer meer van die gebied kan bestudeer as wat ’n robottuig kan doen. – elvira@republikein.com.na

Mars-helikopter oortref stoutste verwagtinge

Kommentaar

Republikein 2025-05-01

Meld asseblief aan om kommentaar te lewer

Mars-helikopter oortref stoutste verwagtinge

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie