Mangaan-uitvoere kry groen lig

Catherine Sasman – Die ministerie van die omgewing en toerisme (MET) het ’n omgewingsklaringsertifikaat (ECC) aan die Suid-Afrikaanse maatskappy TradePort Namibia CC uitgereik. Dié maatskappy is een van verskeie wat beplan om mangaan deur die Lüderitz-hawe uit te voer.Mnr. Romeo Muyunda, woordvoerder van die ministerie, het bevestig die sertifikaat is op 7 Februarie uitgereik.Volgens hom is dit ná deeglike ondersoek gedoen, en ook ná insette oor die aansoek ontvang is.Die sertifikaat keur die invoer en uitvoer van mangaanerts “en ander kommoditeite” goed.“Gewoonlik beteken dít die ministerie is tevrede met 'n omgewingsbestuurplan wat vir so 'n aktiwiteit voorsien word," het Muyunda gesê.Hy het nie gesê of daar enige nagevolge vir TradePort sal wees omdat hulle mangaanerts in Desember en Januarie vanuit Suid-Afrika na Lüderitz gebring het sonder ’n klaringsertifikaat nie. Oortreding van die Omgewingsbestuurwet van 2007 kan gestraf word met 'n boete van nie meer as N$500 000 of gevangenisstraf van hoogstens 25 jaar, of albei.'n Drukgroep bestaande uit Lüderitz-inwoners het ’n onmiddellike moratorium op alle beweging van mangaanerts na en van Lüderitz se hawe versoek, totdat voldoende en omgewingsnavorsing gedoen is om die moontlike negatiewe en dodelike impak te identifiseer en te beperk.Die groep wou nog nie kommentaar lewer oor die sertifikaat wat uitgereik is nie, omdat hulle glo nog nie genoeg inligting van die ministerie ontvang het nie. “Geen kommentaar,” het ’n inwoner, mnr. Crispin Clay, gesê en bygevoeg die drukgroep ondersoek nog die omstandighede rondom die uitreiking van die sertifikaat. “Ons is egter nie beïndruk met wat ons voel ’n verdagte en ondeursigtige manier is waarop hierdie saak deur TradePort, NamPort en moontlik die ministerie hanteer is nie. “Dit is nie in die gees van die wet gedoen nie. Ons word soos sampioene behandel,” het Clay gesê.Inwoners hou vol daar was geen openbare beraadslaging mert TradePort nie en die maatskappy het bloot advertensies in koerante geplaas, wat nie geredelik op die dorp beskikbaar is nie, waarin hulle aangekondig het hulle gaan mangaanerts deur Lüderitz vervoer. “Ons is nie tevrede nie, en ons gaan dit nie daar laat nie,” het Clay gesê. VoorwaardesVan die voorwaardes van die sertifikaat sluit in dat materiaal wat stof versprei nie in die oopte by die Ariamsvlei-grens mag ophoop nie.Sodanige materiaal mag ook nie buite op die sementblad lê wat TradePort vir bergingsdoeleindes voorberei het nie.Slegs verpakte materiaal mag “in ooreenstemming met TransNamib en NamPort se vereistes” geberg word.Verder moet alle moontlike stowwerige materiaal soos klonterige mangaanerts, wat van Suid-Afrika af vervoer word, direk in pakhuise by Ariamsvlei en die Lüderitz-hawe gestoor word sonder dat dit tydelik op die sementblad lê. Indien bykomende storing buite die hawe nodig is, moet ’n pakhuis by die sementblad opgerig word. Die sertifikaat verklaar hierdie maatreëls sal die risiko van stof in die omgewing en verkeersopeenhopings op die dorp “aansienlik verminder”.Die sertifikaat bepaal ook aflewerings deur lorries moet oor ’n langer tydperk en minder dikwels plaasvind.Mangaanerts en alle ander materiaal wat vervoer word, moet “in 'n stabiele toestand wees, bedek wees en teen stowwerigheid behandel word”.Die sertifikaat sê ook die mangaanerts moet by myne in Suid-Afrika gesif word, met die toepaslike voginhoud hanteer word en altyd bedek wees om te voorkom dat stof onderweg vrygestel word.Die laai van die mangaan op skepe by die hawe moet in ooreenstemming met NamPort se bedryfsvereistes gedoen word.

Mangaan-uitvoere kry groen lig

Kommentaar

Republikein 2025-06-10

Meld asseblief aan om kommentaar te lewer

Mangaan-uitvoere kry groen lig

Kommentaar

Republikein 2025-06-10

Meld asseblief aan om kommentaar te lewer

MELD AAN

Advertensie