Man val reaksievoertuig aan
Die vermoedelik versteurde boemelaar stap glo gereeld met 'n winkeltrollie rond.
Ronelle Rademeyer - 'n Vermoedelik versteurde boemelaar het Vrydagaand 'n reaksievoertuig van Homestar Security in Klein Windhoek aangeval deur die ruit met 'n knopkierie stukkend te slaan en daarna die tweerigtingradio uit te pluk.
Mnr. PW van Jaarsveld, reaksiebestuurder by dié sekuriteitsmaatskappy, sê die voorval het omstreeks elfuur by 'n toegeeteken in Barellastraat gebeur.
“Een van ons reaksievoertuie het 'n huis besoek waar 'n alarm afgegaan het en ek het met my voertuig ook daarheen gery. Nadat ons seker gemaak het alles is reg by dié huis, het ek met my bakkie agter die reaksievoertuig aangery in die rigting van die Puma-vulstasie in Nelson Mandelarylaan.”
Van Jaarsveld sê by die toegeeteken in Barellastraat het hy gesien hoe 'n man skielik die reaksievoertuig se windskerm en die venster van die linkervoordeur met 'n voorwerp stukkend slaan.
Toe die sekuriteitswag in die voertuig na die tweerigtingradio gryp om hulp te ontbied, het die aanvaller in die voertuig ingeleun en die radio uitgepluk.
Van Jaarsveld sê hy het intussen stilgehou en uitgespring en die man het hom met 'n klip onder sy knie gegooi. Toe hy op die grond val, het die man hom met 'n skerp voorwerp aangeval.
“Ek het gelukkig 'n koeëlvaste baadjie aangehad en nie seergekry nie.” Hy sê hy kon daarin slaag om 'n waarskuwingskoot af te vuur, waarna die man weggehardloop het.
Hy en die sekuriteitswag het agter die aanvaller aangehardloop en hom agtervolg toe hy met die Klein Windhoekrivier langs gevlug het. By Von Eckenbrecherstraat het iemand op 'n vierwielmotorfiets gesien wat gebeur en ook probeer om die man in die rivierbedding aan te keer.
Uiteindelik het die polisie opgedaag en die man is gearresteer.
Van Jaarsveld sê die man praat Afrikaans, Engels en Portugees en is in sy laat veertigs.
Hy sê hulle is na die Klein Windhoek-polisiekantoor waar 'n klag van opsetlike saakbeskadiging teen die man aanhangig gemaak is.
“Die polisie sê hulle ken die man. Hy stap glo gereeld in die dorp met 'n winkeltrollie rond waarin allerhande goed gepak is.”
Van Jaarsveld sê dit wil voorkom of die man versteurd is, want toe hy hom vra waarom hy die reaksievoertuig aangeval het, het hy gesê omdat dié voertuig “sy kar gestamp het”.
Mnr. PW van Jaarsveld, reaksiebestuurder by dié sekuriteitsmaatskappy, sê die voorval het omstreeks elfuur by 'n toegeeteken in Barellastraat gebeur.
“Een van ons reaksievoertuie het 'n huis besoek waar 'n alarm afgegaan het en ek het met my voertuig ook daarheen gery. Nadat ons seker gemaak het alles is reg by dié huis, het ek met my bakkie agter die reaksievoertuig aangery in die rigting van die Puma-vulstasie in Nelson Mandelarylaan.”
Van Jaarsveld sê by die toegeeteken in Barellastraat het hy gesien hoe 'n man skielik die reaksievoertuig se windskerm en die venster van die linkervoordeur met 'n voorwerp stukkend slaan.
Toe die sekuriteitswag in die voertuig na die tweerigtingradio gryp om hulp te ontbied, het die aanvaller in die voertuig ingeleun en die radio uitgepluk.
Van Jaarsveld sê hy het intussen stilgehou en uitgespring en die man het hom met 'n klip onder sy knie gegooi. Toe hy op die grond val, het die man hom met 'n skerp voorwerp aangeval.
“Ek het gelukkig 'n koeëlvaste baadjie aangehad en nie seergekry nie.” Hy sê hy kon daarin slaag om 'n waarskuwingskoot af te vuur, waarna die man weggehardloop het.
Hy en die sekuriteitswag het agter die aanvaller aangehardloop en hom agtervolg toe hy met die Klein Windhoekrivier langs gevlug het. By Von Eckenbrecherstraat het iemand op 'n vierwielmotorfiets gesien wat gebeur en ook probeer om die man in die rivierbedding aan te keer.
Uiteindelik het die polisie opgedaag en die man is gearresteer.
Van Jaarsveld sê die man praat Afrikaans, Engels en Portugees en is in sy laat veertigs.
Hy sê hulle is na die Klein Windhoek-polisiekantoor waar 'n klag van opsetlike saakbeskadiging teen die man aanhangig gemaak is.
“Die polisie sê hulle ken die man. Hy stap glo gereeld in die dorp met 'n winkeltrollie rond waarin allerhande goed gepak is.”
Van Jaarsveld sê dit wil voorkom of die man versteurd is, want toe hy hom vra waarom hy die reaksievoertuig aangeval het, het hy gesê omdat dié voertuig “sy kar gestamp het”.
Kommentaar
Republikein
Geen kommentaar is op hierdie artikel gelaat nie