Man stap 1 870 km vir renosters

Francoise Steynberg - Van die Oranje tot die Kunene. Dis die lang pad van altesaam 1 870 km wat 'n man van byna 60 jaar gestap het.Dave van Graan (59), 'n toergids van Louis Trichardt in die Limpopo-provinsie in Suid-Afrika, het dit met een doelwit voor oë gedoen: Om bewustheid oor wildstropery en renosterbewaring te skep.“Ek het die staptog deur en deur vir Namibië gedoen. Ek het ten bate van Africa Anti-Poaching Services (AAPS) gestap wat teenstropery-opleiding aan Namibië se natuurbewaarders aanbied,” het Dave gesê.Hy het op 1 Desember op Rosh Pinah weggespring en ná twee maande van swoeg en sweet Saterdag by Ruacana aangekom.Dave het 'n trollie getrek waarop al sy toerusting was. Hy sê die pad was lank en hy het op baie plekke swaar gekry. “In die woestyn was slegte paaie met baie op- en afdraandes. In die Suide met die versengende hitte was dit baie moeilik. Ek het ook swaar gekry op die stuk tussen Kamanjab en Ruacana waar nie regtig dorpe is nie,” het Dave gister telefonies aan Republikein vanaf die Galton-hek aan die westekant van die Etosha Nasionale Park gesê.“Nou gaan ek eers 'n blaaskans vat en vakansie in Etosha hou.”Daarna sal hy sy werk as toergids hervat en toeriste deur Namibië en Botswana neem. Hy doen dit al drie jaar lank. 'n Welverdiende vakansie is dit beslis. “Ek het geen amptelike ondersteuning gehad nie, maar die hele Namibië het my ondersteun. My trollie se voorvurk het gebreek en 'n raadslid van Kamanjab het my gehelp,” vertel Dave.“Ek het die lekkerste op Kamanjab gekuier. Jumbo Marais het vir my eiers, koeldrank, brood en bier gegee.”Dave sê hy het maar so met sy reis op die pad kos gekoop, maar talle Namibiërs het tydens sy tog vir hom iets te ete gegee. “Ek het die Namibiërs as baie vriendelik en hulpvaardig beleef.”Op Dave se Facebook-blad stroom die gelukwensinge in. “Jy het vasbyt wat min mense het. Jy is sowaar 'n inspirasie en voorbeeld vir my!” lui een van die kommentare. “Jy is 'n superheld!”

Man stap 1 870 km vir renosters

Kommentaar

Republikein 2025-05-22

Meld asseblief aan om kommentaar te lewer

Man stap 1 870 km vir renosters

Kommentaar

Republikein 2025-05-22

Meld asseblief aan om kommentaar te lewer

MELD AAN

Advertensie