Man skiet vrou, homself op Rehoboth

’n Tragedie het die Rehoboth-gemeenskap vanoggend geruk nadat ’n 47-jarige man eers sy vrou (38) in die kop geskiet en daarna homself doodgeskiet het.

Volgens adj.komm. Eric Clay van die Namibiese polisie (Nampol) in die Hardapstreek, het die voorval omstreeks 02:08 glo ná ’n rusie tussen die egpaar plaasgevind.

“Die man het op die toneel gesterf nadat hy homself ook in die kop geskiet het. Sy vrou is na ’n Windhoekse hospitaal gehaas waar sy in ’n kritieke toestand verkeer,” het Clay gesê.

Volgens hom is dit nog in hierdie stadium onduidelik waaroor die egpaar geargumenteer het. Die polisieondersoek duur voort.