Man pleit skuldig aan moord

Jessica Botes - ’n Man het Woensdag in die hoërhof erken hy het die ma van sy ses kinders op Otjinene vermoor. Kaxui Katjivi het glo die 26-jarige Dina Anton op 31 Julie 2014 tien keer met ‘n mes gesteek. Volgens die klagstaat wou Anton haar besittings uit die paartjie se huis verwyder, omdat sy na haar familie op Okakarara wou gaan.Die beskuldigde het haar glo beveel om nie haar besittings te vat nie en om by die huis te bly. Katjivi het na bewering die oorledene aangerand deur haar te slaan en op die bed neer te gooi voordat hy haar met die mes aangeval het. Katjivi het op klagte van moord, aanranding met die doel om ernstig te beseer en aanranding skuldig gepleit. Terwyl die klagte deur regter Christie Liebenberg aan hom voorgelees is in die hof, het die beskuldigde gesê hy weet hy het dinge gedoen wat hy nie moes doen nie. Katjivi het op die bewering dat hy tydens dieselfde voorval vir mnr. Alfeus Katai Haurumbu aangerand het met die doel om hom ernstig te beseer, geantwoord dat hy nie kon onthou wat gebeur het nie. Hy het egter volgehou dat hy op hierdie klag wil skuldig pleit. Volgens die klagstaat het Katjivi vir Haurumbu aangerand deur steekbewegings met ‘n mes na hom te maak met die doel om hom te beseer. Haurumbu wou glo vir Anton help toe Katjivi die mes na hom gedraai het. Gedurende die voorval het die beskuldigde glo ook vir me. Bertha Tlao Eises aangerand toe sy die oorledene probeer help het. Volgens die klagstaat het Katjivi vir Eises met die mes gedreig en haar uit die huis gestoot. Liebenberg het Katjivi se pleit voorlopig aanvaar met die voorwaarde dat sy regsverteenwoordiger, mnr. Africa Jantjies, ‘n aanvullende pleitverklaring by die hof in dien. “Hiermee moet die beskuldigde die omstandighede waaronder elke oortreding gepleeg is, volledig verduidelik. Die hof kan nie ‘n erkenning van die bloot noodsaaklike elemente van die misdaad aanvaar nie,” het Liebenberg gesê.Hy het ook vir adjunk-aanklaer-generaal Antonia Verhoef gevra om die klag van aanranding met die doel om ernstig te beseer te hersien, omdat Haurumbu nie enige beserings tydens die voorval opgedoen het nie. Volgens Liebenberg het Katjivi net die voorneme gehad om vir Haurumbu met die mes te steek. Katjivi het ‘n paar dae ná die voorval tydens ‘n verskyning in die rondgaande hof op Otjinene gesê die oorledene se familie het hom daarvan beskuldig dat hy Anton wil vermoor. Dié beskuldiging het hom glo gedwing om die daad voor hul kinders te pleeg, waarna hy hom aan die polisie oorgegee het.Liebenberg het die verhoor vir vonnisopleggingverrigtinge tot 31 Mei uitgestel.

Man pleit skuldig aan moord

Kommentaar

Republikein 2026-09-18

Meld asseblief aan om kommentaar te lewer

Man pleit skuldig aan moord

Kommentaar

Republikein 2026-09-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.