Man moor uit selfverdediging

Jessica Botes’n Man wat sy lewensmaat doodgeslaan het, is op ’n klag van strafbare manslag skuldig bevind. Otto Angula en die oorledene, me. Martha Nakale, het by die munisipale stortingsterrein op Walvisbaai stukke yster versamel om te verkoop. Op 22 November 2012 het Angula na die stortingsterrein gegaan en Nakale gegroet. Sy het hom nie teruggegroet nie, maar vir hom vertel van die “pragtige, bevredigende aand” wat sy met ’n ander man deurgebring het. Angula was woedend en het geëis dat Nakale die juwele moet teruggee wat hy vir haar gekoop het. Sy het geweier. Angula het haar gegryp en die twee het begin stoei. Nakale het me. Aina Sesitenus, wat voorheen saam met ene Lovisa vir Angula aangerand het, geroep om haar te help. “’n Angstige Angula het teruggedink aan hoe Aina en Lovisa hom voorheen aangerand het deur hom te gryp en op die grond neer te druk. Hulle het hom gewurg, hom aan sy geslagsorgane gegryp en aangerand, totdat ’n ander man Angula kom help het,” het regter Alfred Siboleka in sy uitspraak gesê.Toe Angula nie daarin kon slaag om uit die oorledene se greep los te breek nie, het hy ’n stuk staal gegryp en Nakale daarmee teen haar kop geslaan. Die beskuldigde het gesê hy het Nakale geslaan in ’n poging om weg te kom, omdat Aina hom soos vantevore sou aanrand.“Die rede waarom ek vir Nakale geslaan het, was omdat ek bang was vir Aina. Sy is ’n gevaarlike vrou. Ek was bang dat ek in die moeilikheid sou gewees het as sy my daar sou kry terwyl ek besig was om die oorledene vas te hou,” het Angula tydens die verhoor gesê.Staatsadvokaat Cliff Lutibezi het tydens die verhoor betoog die hof moet Angula skuldig bevind aan moord met direkte opset, omdat getuienis tydens die verhoor gelewer is dat Nakale gesê het “my liefie, moenie my doodmaak nie, kom ons praat”. Siboleka het egter bevind die bewyse voor die hof dui daarop dat Angula nie vir Nakale met direkte opset vermoor het nie. “Met inagname van al die bewyse voor die hof en die feit dat Angula bang was vir Aina wat op hom afgestorm het, is dit duidelik dat hy uit selfverdediging opgetree het,” het Siboleka gesê.Angula het aan die begin van sy verhoor skuldig gepleit, maar volgehou dat hy nie bedoel het om Nakale te vermoor nie. Hy het homself tydens die verhoor verteenwoordig.

Man moor uit selfverdediging

Kommentaar

Republikein 2025-11-06

Meld asseblief aan om kommentaar te lewer

Man moor uit selfverdediging

Kommentaar

Republikein 2025-11-06

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.