Man leef ná berigte oor sy afsterwe

’n 38-jarige man van Khorixas is verkeerdelik as dood aangemeld ná ’n kommunikasiefout in ’n Namibiese polisieverslag.
Mnr. Arnold Eiseb het volgens ’n onlangse misdaadverslag glo op Nuwejaarsdag op twee leë bierbottels geval, maar anders as wat aanvanklik berig is, het Eiseb nie aan die wonde beswyk nie.
Hy het die voorval oorleef, hoewel hy steeds in ’n stabiele toestand in die hospitaal is.
“Dit was ’n tikfout. Die betrokke opskrif moes lui ‘poging tot moord’ en nie ‘moord’ nie. Ek vra namens die polisie om verskoning vir die fout,” het die nasionale woordvoerder van die polisie, adj.komm. Kauna Shikwambi, aan die nuusagentskap gesê.
Die polisie in Khorixas vermoed vuilspel en het ’n saak van poging tot moord geopen en ondersoek tans die saak.
Volgens inspekteur Paul Gaoseb, waarnemende stasiebevelvoerder in Khorixas, is nog geen verdagtes in hegtenis geneem nie en wag die ondersoekbeamptes vir Eiseb om uit die hospitaal ontslaan te word.
– Nampa