Malawi: Alternatief vir tabak gesoek
Internasionale tendense in tabakmarkte, gesondheid en die omgewing plaas druk op die Malawiese bedryf.
Landboukenners verbonde aan die Universiteit Stellenbosch (US) gaan, tesame met internasionale vennote, Malawiese boere oor die volgende vyf jaar help om na alternatiewe vir tabakverbouing te soek.
Malawi is volgens 2016 se syfers die 13de grootste produsent van tabak ter wêreld. Die land verdien 59% van sy totale inkomste uit tabakuitvoere en nagenoeg 32% van Malawiërs is by die verbouing van hierdie gewas betrokke, lui ’n verklaring wat deur die US uitgereik is.
Die land se ekonomie is dus uiters nou met tabakboerdery verweef, en daarom meen kenners dat veranderinge in die gebruik van tabakprodukte oor die wêreld heen die Malawiese ekonomie op die lang termyn beduidend kan beïnvloed.
’n Nuwe inisiatief, die Sentrum vir Landboutransformasie in Malawi (M-CAT of Malawi Centre for Agricultural Transformation), is egter daarop gemik om die land minder afhanklik van tabakverbouing te maak en die ekonomie te diversifiseer. Nuwe opsies en markte binne die landboubedryf sal gesoek en geïdentifiseer word.
Die US se fakulteit agriwetenskappe, en veral die departement landbou-ekonomie, is vennote in die projek.
Dit sal vyf jaar lank duur en die befondsing beloop $5 miljoen.
Die Foundation for a Smoke Free World (Fsfw) het die geld in Desember aan die projek toegeken.
Die Universiteit van Minnesota in die VSA, die Malawi-Universiteit van Wetenskap en Tegnologie en die niewinsgewende maatskappy Land O’Lakes International Development is ook by die inisiatief betrokke.
Die eerste beplanningsessie tussen die onderskeie projekvennote sal in Meimaand op eie bodem by die US plaasvind.
Verandering kom
Volgens die M-CAT-vennote oefen internasionale tendense rondom tabakmarkte, gesondheidskwessies en omgewingsake reeds druk op die Malawiese bedryf uit. Daarom het die regering in Malawi self die nodigheid gesien om die land se ekonomie te diversifiseer en sy afhanklikheid van tabak as die grootste buitelandse valutaverdiener te verslap, lui die verklaring verder.
“Ons wil deur die M-CAT-projek voorkomend probeer optree. Ons is ’n sterk netwerk van vennote wat wil saamwerk om Malawiese boere te help om alternatiewe gewasse te vind wat steeds winsgewend uitgevoer kan word,” verduidelik prof. Danie Brink, dekaan van die US se fakulteit agriwetenskappe.
“Sodoende sal die land steeds allerbelangrike buitelandse valuta kan verdien,” sê hy.
Volgens die M-CAT-vennote het tabakboerdery kleinboere nog nooit uit armoede gelig nie. Die kenners verbonde aan die projek hoop om baie goeie data in te samel en te analiseer, en dít dan te gebruik om doeltreffende beleid te help skryf en hulpbronne sinvol in te span.
Hulle sal aanvanklik navorsing doen oor Malawiese landbou-ekonomiese aangeleenthede en verwante velde.
‘Kondisies bekend’
Volgens die verklaring is al die vennote met die toestande in Malawi vertroud.
Die Universiteit van Minnesota het byvoorbeeld onlangse tabakverwante navorsing gedoen, terwyl ’n aantal Malawiese nagraadse studente die afgelope paar jaar grade aan die US ontvang het.
Land O’ Lakes International Development werk reeds die afgelope 20 jaar in die land, en het onlangs danksy die MSIKA-projek met ’n Malawiese tabakmaatskappy kragte saamgesnoer. Daardeur word sowat 3 000 kleinboere met raad en daad ondersteun oor hoe om hoë-waarde gewasse te begin plant.
Die US sal die wetenskaplike en tegnologiese bene van die M-CAT-projek ondersteun. Relevante landboukundige, meteorologiese en geologiese data wat in Malawi ingesamel word, word deur navorsers van die departement landbou-ekonomie ontleed.
Die Universiteit van Minnesota sal die US hierin ondersteun.
Volgens Brink sal die projek ook aan meer Malawiese studente die kans gee om aan die US te studeer.
Hulle sal aanvanklik navorsing doen oor Malawiese landbou-ekonomiese aangeleenthede en verwante velde.
Dit sal uitgebrei kan word sodra spesifieke gewasse en produkte geïdentifiseer is wat geskik kan wees om die Malawiese ekonomie te ondersteun.
“Studente sal ook kans kry om ’n paar maande lank by een van ons vennoot-instellings, die Universiteit van Minnesota, te bestee,” voeg hy by. – Netwerk24
Malawi is volgens 2016 se syfers die 13de grootste produsent van tabak ter wêreld. Die land verdien 59% van sy totale inkomste uit tabakuitvoere en nagenoeg 32% van Malawiërs is by die verbouing van hierdie gewas betrokke, lui ’n verklaring wat deur die US uitgereik is.
Die land se ekonomie is dus uiters nou met tabakboerdery verweef, en daarom meen kenners dat veranderinge in die gebruik van tabakprodukte oor die wêreld heen die Malawiese ekonomie op die lang termyn beduidend kan beïnvloed.
’n Nuwe inisiatief, die Sentrum vir Landboutransformasie in Malawi (M-CAT of Malawi Centre for Agricultural Transformation), is egter daarop gemik om die land minder afhanklik van tabakverbouing te maak en die ekonomie te diversifiseer. Nuwe opsies en markte binne die landboubedryf sal gesoek en geïdentifiseer word.
Die US se fakulteit agriwetenskappe, en veral die departement landbou-ekonomie, is vennote in die projek.
Dit sal vyf jaar lank duur en die befondsing beloop $5 miljoen.
Die Foundation for a Smoke Free World (Fsfw) het die geld in Desember aan die projek toegeken.
Die Universiteit van Minnesota in die VSA, die Malawi-Universiteit van Wetenskap en Tegnologie en die niewinsgewende maatskappy Land O’Lakes International Development is ook by die inisiatief betrokke.
Die eerste beplanningsessie tussen die onderskeie projekvennote sal in Meimaand op eie bodem by die US plaasvind.
Verandering kom
Volgens die M-CAT-vennote oefen internasionale tendense rondom tabakmarkte, gesondheidskwessies en omgewingsake reeds druk op die Malawiese bedryf uit. Daarom het die regering in Malawi self die nodigheid gesien om die land se ekonomie te diversifiseer en sy afhanklikheid van tabak as die grootste buitelandse valutaverdiener te verslap, lui die verklaring verder.
“Ons wil deur die M-CAT-projek voorkomend probeer optree. Ons is ’n sterk netwerk van vennote wat wil saamwerk om Malawiese boere te help om alternatiewe gewasse te vind wat steeds winsgewend uitgevoer kan word,” verduidelik prof. Danie Brink, dekaan van die US se fakulteit agriwetenskappe.
“Sodoende sal die land steeds allerbelangrike buitelandse valuta kan verdien,” sê hy.
Volgens die M-CAT-vennote het tabakboerdery kleinboere nog nooit uit armoede gelig nie. Die kenners verbonde aan die projek hoop om baie goeie data in te samel en te analiseer, en dít dan te gebruik om doeltreffende beleid te help skryf en hulpbronne sinvol in te span.
Hulle sal aanvanklik navorsing doen oor Malawiese landbou-ekonomiese aangeleenthede en verwante velde.
‘Kondisies bekend’
Volgens die verklaring is al die vennote met die toestande in Malawi vertroud.
Die Universiteit van Minnesota het byvoorbeeld onlangse tabakverwante navorsing gedoen, terwyl ’n aantal Malawiese nagraadse studente die afgelope paar jaar grade aan die US ontvang het.
Land O’ Lakes International Development werk reeds die afgelope 20 jaar in die land, en het onlangs danksy die MSIKA-projek met ’n Malawiese tabakmaatskappy kragte saamgesnoer. Daardeur word sowat 3 000 kleinboere met raad en daad ondersteun oor hoe om hoë-waarde gewasse te begin plant.
Die US sal die wetenskaplike en tegnologiese bene van die M-CAT-projek ondersteun. Relevante landboukundige, meteorologiese en geologiese data wat in Malawi ingesamel word, word deur navorsers van die departement landbou-ekonomie ontleed.
Die Universiteit van Minnesota sal die US hierin ondersteun.
Volgens Brink sal die projek ook aan meer Malawiese studente die kans gee om aan die US te studeer.
Hulle sal aanvanklik navorsing doen oor Malawiese landbou-ekonomiese aangeleenthede en verwante velde.
Dit sal uitgebrei kan word sodra spesifieke gewasse en produkte geïdentifiseer is wat geskik kan wees om die Malawiese ekonomie te ondersteun.
“Studente sal ook kans kry om ’n paar maande lank by een van ons vennoot-instellings, die Universiteit van Minnesota, te bestee,” voeg hy by. – Netwerk24
Kommentaar
Republikein
Geen kommentaar is op hierdie artikel gelaat nie