Major League baie goeie leerskool, sê Booysen

Andrew Poolman – Namibië beskik gewis oor spelers van voldoende gehalte om volgende jaar die taak van kwalifisering vir die 2023 Wêreldbeker in Frankryk suksesvol af te handel en ’n goeie vertoning te lewer.“Namibië het seker nou die meeste professioneel gekontrakteerde spelers as in enige stadium tevore op een slag. Met ’n behoorlike oefenkamp as al die ouens beskikbaar gemaak en bymekaar gebring word, glo ek ons sal vir seker in ’n sterk posisie wees.”Dié mening kom van Adriaan Booysen, een van vyf Namibiërs wat pas die afgelope seisoen in die VSA se Major League Rugby (MLR) afgesluit het.Die 25-jarige agtsteman het in elkeen van sy franchise in Texas, die Houston SaberCats, se 16 wedstryde gespeel. Hoewel die span net twee hiervan kon wen, glo hy dat sy spel vooruit beweeg het.“Ek het nogal baie speeltyd gekry (agt keer in beginspan, altesame 797 minute gespeel) en het dit baie geniet.“Dinge was bietjie deurmekaar toe die klub ’n nuwe hoofafrigter aangestel het met nog omtrent vyf wedstryde oor. Nogtans voel ek dat ek my kanse goed gebruik het.“Ten minste was hierdie ’n volle seisoen, nadat die liga verlede jaar reeds in Maart met die uitbreek van Covid gestaak is. Dit was dus ’n baie lang afseisoen totdat ons eers in Februarie weer bymekaar gekom het.“Met twee opwarmwedstryde en 16 ligawedstryde voel ek dat my eie spelvlak verbeter het, net soos die peil van die SaberCats en elke ander span namate die seisoen momentum gekry het.“Ons het nou weer bietjie van ’n afseisoen tot ons so laat Desember of vroeg Januarie terugkeer.“Laas jaar het die SaberCats nog in ’n openbare gimnasium geoefen, maar van hierdie jaar het ons ’n eie gimnasium reg langs ons oefenveld.“Major League Rugby is vir seker die hoogste vlak waarop ek nog gespeel het; ’n beter vlak as klubrugby in Windhoek, koshuisrugby in Suid-Afrika of Welwitschias-wedstryde. Ek sou dit vergelyk met die Curriebeker; dalk nog nie gelykstaande aan Superrugby nie.“In vergelyking met die voortydige opskorting ná net vyf wedstryde in 2020, het hierdie seisoen algaande meer fisieke rugby en ’n vinniger tempo gelewer.“’n Klomp spanne het ook goeie nuwe spelers van oorsee gekontrakteer. Met die byvoeging van spelers met ervaring van toets- of Superrugby kon mens sien hoe die standaard week na week klim.”Booysen en die haker Obert Nortjé, van die Seattle Seawolves, was die enigste van die vyftal in Amerika wat vroeg in Julie by die allerbelangrike Namibiese toer na Ivoorkus aangesluit het.Die Namibiese span, wat onder Allister Coetzee as die nuwe afrigter ’n nuwe era moes afskop, kon op die eerste dag teen Ivoorkus nie uit eerste rat kom nie en is met 13-24 geklop, maar het reggeruk deur Madagaskar met 52-10 af te stof.Ter afsluiting het Madagaskar, ondanks hul uitskakeling, ’n guns bewys deur Ivoorkus te verslaan, met die uiteinde dat Namibië wel op punteverskil boaan dié mini-groep klaargemaak het.“Die toer was moeilik met net ’n hand vol professionele spelers, terwyl die plaaslike spelers se klubseisoen kortgeknip is deur die Covid-inperking en dus nie behoorlik kon speel of oefen nie.“In volgende jaar se (Rugby Afrika Top Agt) kwarteind-, halfeind- en eindstryd moet ons dus nou net elke wedstryd wen (teen Burkina Faso, dan waarskynlik Zimbabwe, dan waarskynlik Kenia) om seker te maak ons gaan in 2023 Wêreldbeker toe. “Ons berei vir seker voor om dit te gaan doen; Namibië het beslis die spelers om dit reg te kry en goed te vaar in Frankryk.”CLIVEN SAL TERUGKEERCliven Loubser, Namibiese losskakel en heelagter in sy eerste seisoen by die Utah Warriors, sê sy span was baie in hul skik met hul prestasie om vir die MLR se semifinaal te kwalifiseer.“Die halfeindstryd (teen die uiteindelike kampioene Los Angeles Giltinis) was kop-aan-kop en ons het in die 70ste minuut nog voorgeloop.“Vir my was die laagtepunt van die afgelope seisoen die twee maande waarin ek met ’n dyspierbesering op die kantlyn was. Dit het my baie teruggehou en ek was selde in staat om 100% my beste spel te lewer.“Ek is vir drie jaar hier by Utah Warriors gekontrakteer, met die derde jaar opsioneel. Ek sal dus definitief volgende jaar terugkeer.“Utah is eintlik die enigste span in die liga wat semi-professioneel is, met sommige spelers wat bedags ander werk het sodat ons net saans ná werk kan oefen. Vir ons om tot die halfeindstryd deur te dring, was dus ’n groot prestasie en glad nie wat ons aan die begin van die seisoen as ’n realistiese doelwit gestel het nie.”• Kyk hier hoe Booysen teen die Atlanta-span twee duikslae uitgevoer het om seker drieë te verhinder: twitter.com/therugbynetwork/status/1407352541692760080KLUB VEREER CONRADIEIn Boston is Wian Conradie as die New England Free Jacks spelers se speler van die seisoen aangewys.Die Namibiese agtsteman bevind hom steeds in Amerika in afwagting op die goedkeuring van sy visum om by sy nuwe Engelse premierligaklub Gloucester te gaan aansluit.Conradie het verreweg die meeste speeltyd van enige Namibiër in dié MLR-seisoen gekry (1 131 minute in 15 wedstryde, waarvan 14 in die opdrafspan was).Die geharde Namibiër het as baldraer ’n baie beduidende 882 meter gevorder; sewe keer die opponente se besit afgeneem; vier drieë gedruk en tot nog twee ’n aanleidende rol gespeel.Hoe voel die man se lyf wat 193 duikslae dié seisoen opgestapel het?“Ek het so twee weke gerus; ek het hierdie week weer bietjie in die gimnasium begin oefen om weer aan die gang te kom. Die tweede blok van ons voorseisoen begin op 16 Augustus. Hopelik het ek dan reeds my visum gekry,” sê hy.• Kyk hier na een van Conradie se beste plettervatte van die seisoen: twitter.com/gloucesterrugby/status/1415676273980887044FOTO’sDie Houston SaberCats webblad se profielfoto van die Namibiese agtsteman Adriaan Booysen.Wian Conradie het as die New England Free Jacks-spelers se speler van die jaar ’n trofee en ’n geraamde trui ontvang waarop dié eerbewys geborduur is. Foto Instagram

Major League baie goeie leerskool, sê Booysen

Kommentaar

Republikein 2025-08-25

Meld asseblief aan om kommentaar te lewer

Major League baie goeie leerskool, sê Booysen

Kommentaar

Republikein 2025-08-25

Meld asseblief aan om kommentaar te lewer

MELD AAN

Advertensie