Maart warmste in baie jare

Elise Tempelhoff - Die gemiddelde temperatuur in Maart was 1,28 °C hoër as die gemiddelde Maart-temperatuur in die tydperk 1951 tot 1980. In elk van die afgelope 11 maande was dit die warmste maand sedert boekhouding van temperatuur 135 jaar gelede begin het.
Maart was 0,36 °C warmer as in Maart 2010, die vorige warmste, sê die Amerikaanse ruimte-agentskap Nasa.
Temperature is die laaste paar maande verhoog deur ’n besonder sterk El Niño-verskynsel.
Maar die vernaamste oorsaak is waarskynlik die oortollige hitte wat in die atmosfeer vasgevang is weens die oormaat kweekhuisgasse wat deur menslike bedrywighede vrygestel word, het Scientific American berig.
Volgens dié publikasie is die grootste temperatuurstygings die afgelope jaar by die Noordpool gemeet.
Weens die hoër temperatuur was die dryfys hier in die winter in die Noordelike Halfrond (Desember en Januarie) ook op ’n rekord-laagtepunt.
Die temperatuurstyging by die Noordpool was vanjaar twee keer soveel as elders op die planeet.
Die poolgebiede speel ’n kernrol in die regulering van die wêreld se weer en daarom is veranderings hier uiters belangrik, sê klimaatkundiges.
Luidens verskeie studies is koraalriwwe besig om teen ’n ongekende tempo te verbleik en in sommige gevalle selfs te sterf.
The Washington Post het Vrydag berig die yslaag in Groenland het aan die begin van die jaar teen die vinnigste tempo nóg gesmelt.
Volgens Stephan Rahmstorf, ’n navorser aan die Potsdam-navorsingsinstituut oor die impak van die klimaat, lyk dit asof die hoë temperature nou die norm geword het.
As dit die geval is, waarsku hy, stuur die wêreld op weghol-klimaatverandering af.
Harvard Business Review (HBR) het die naweek hieroor geskryf: “Vergeet nou eers van die ysbere – jou pensioen en aftreegeld is diep in die moeilikheid.”
Klimaatverandering is duur (byvoorbeeld weens die koste wat verliese teweegbring), berig HBR.
“Baie, baie duur. Dit is ’n feit dat as jy aan die planeet se termostaat peuter, dit jou as mens duur te staan kom.” - Netwerk24