Lykie van maand oue baba op ashoop gevind

Tuyeimo Haidula - Die polisie in die Omusatistreek vra die publiek om hulle te help om 'n een maand oue baba te identifiseer wat vanmiddag (Vrydag) dood by ‘n stortingsterrein by die Uukwalumbe-nedersetting in die Okahao-kiesafdeling gevind is.
Komm. Titus Shikongo, streeksbevelvoerder, sê ‘n onbekende verdagte het vermoedelik 'n babaseuntjie vermoor, die lyk in 'n plastieksak geplaas en dit in 'n asblik gegooi wat by die stortingsterrein ontdek is.
Shikongo sê dit is ontdek toe plaaslike mense wat vir bruikbare items by die stortingsterrein gesoek het, daarop afgekom het.
Hy sê die gru-ontdekking is omstreeks 13:00 gemaak.
Die lykie is van die toneel verwyder en na die Okahao-polisielykshuis geneem vir die nadoodse om uitgevoer te word terwyl die ondersoek voortduur.
Hy het gesê dit is nie seker of die verdagte 'n inwoner van die dorp Okahao is of dalk iemand van die omliggende dorpe of ander dorpe is wat spesifiek daarheen gereis het om sy/haar misdaad te verbloem nie.
Shikongo het ‘n beroep op die publiek gedoen om met inligting na vore te kom en het bygevoeg dat elke wenk welkom sal wees. Inligting wat verskaf word, sal vertroulik hanteer word aangesien die doel is om die ondersoeknet wyd te gooi om die skuldige op te spoor.
Enigiemand met inligting kan hom by 081 203 1477 of 081 359 4506 kontak, of met die naaste polisiekantoor in verbinding tree.