Lyk van man in rioolgat nog nie uitgeken

Ronelle Rademeyer – Die oorskot van 'n man wat Maandag in 'n rioolpyp in Windhoek ontdek is, is nog nie uitgeken nie.

Die nasionale polisiewoordvoerder, adj.komm. Kauna Shikwambi, het vroeër die week bekend gemaak die lyk van die ongeïdentifiseerde man is in die rioolpyp in 'n rivierbedding in Katutura gevind. Dit het gebeur toe werknemers van die munisipaliteit besig was om die rioolpyp reg te maak nadat 'n verstopping aangemeld is.

“Inwoners in die omgewing van Namcol en die Namibië Primêre Skool het in die voorafgaande week gekla oor rioolpypverstoppings in hul buurt,” sê sy.

Sy sê die oorsaak van sy dood is nog nie bekend nie. “Die nadoodse ondersoek sal vandag (Woensdag) gedoen word.”

Shikwambi het gister opnuut 'n beroep op lede van die publiek gedoen wat 'n vermiste familielid het, om die polisie se lykshuis in Windhoek te besoek met die doel om hom uit te ken.

“Verskeie mense het die lykshuis al besoek, maar kon nog nie die oorskot identifiseer nie.

“Hoewel die liggaam al begin ontbind het, kan dit steeds uitgeken word aan byvoorbeeld die klere,” sê sy. 

- [email protected]