Lugballonvlug was g’n drama

Tanja Bause - ’n Lugballon het Maandag veilig op Swakopmund se Langstrand geland, al word die teendeel in sosiale media beweer.Ná die landing het mnr. Martin Lofty-Eaton, die vlieënier, en sy passasiers sopnat gereën, maar geen probleme is tydens die vlug ondervind nie.“Ons het agter die duinegordel nader aan Walvisbaai se kant opgestyg. Met lugballonne vlieg jy waarnatoe die wind jou neem en in dié geval het ons oor die duinegordel Langstrand se kant toe gevlieg. Ek het my bemanning op die grond laat weet waarnatoe ons vlieg, en hulle het omgery en ons kom haal, omdat hulle nie oor die duinegordel kon ry nie,” het Lofty-Eaton gesê. Saam met hom op die vlug was die Duitse toeriste mnr. Andreas Moser en sy seuns Leo en Lenz.“Dit was ’n baie professionele en goeie vlug. Ons het oor die duine gevlieg en sowat ’n kilometer van die hoofpad af op die sand geland. Ek het al baie ballonvlugte meegemaak en het in geen stadium onveilig gevoel nie,” het Moser gesê. Volgens Moser was die bemanning sowat vyf minute ná hul landing by hulle en is die lugballon opgepak en die geselskap na hul hotel geneem. Lofty-Eaton vlieg al die afgelope twee jaar lugballonne vir Hot Air Ballooning Namibia op Swakopmund, maar het die afgelope vyf jaar ’n lisensie daarvoor en vlieg reeds vyf jaar sonder voorval. Ná die landing het ’n reënbui op Langstrand uitgesak en die passasiers, vlieënier en bemanning het natgereën.“Reën is in elk geval ook nie ’n probleem nie en die lugballon kan wel in reën vlieg, solank dit nie in ’n donderstorm of weerlig invlieg nie,” het Lofty-Eaton gesê. “Ek dink nie die mense is daaraan gewoond dat ’n lugballon oor die duinegordel kom nie, dus het hulle gedink daar’s probleme, maar dit is nie waar nie. Daar was niks fout met die vlug nie en ek en my seuns het dit geweldig geniet,” het Moser gesê.

Lugballonvlug was g’n drama

Kommentaar

Republikein 2026-05-05

Meld asseblief aan om kommentaar te lewer

Lugballonvlug was g’n drama

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.